اؤزبکیستان تورک کنه‌شینه قاتیلدی
"ایلک دفعه تورکمنیستان‌دان دا مثبت سیگنال آلدیق. گؤزلمچی عضو اولاراق باشلاماق ایسته‌دیکلرینی دئدیلر"
خاریجی ایشلر باخانی مؤولود چاووش‌اوغلو، اؤزبکیستانین تورک اؤلکه‌لری امکداش‌لیق شوراسینا (تورک کنه‌شی) قوشولما قراری آلدیغینی، تورکمنیستانین دا گؤزلمچی عضو اولماق ایسته‌دیگینی بیلدیردی.
چاووش‌اوغلو، تورک دونیاسی اوچون قورولان تورک کنه‌شی‌نین گئتدیکجه بؤیودویونو قید ائد‌رک، ۱۶ اکتبردا بو ایلکی ذیروه توپلانتیسینین ائدیله‌جگینی سؤیله‌دی.
اؤزبکیستانین تورک شوراسینا قاتیلما قراری آلدیغینی و رسمی مراجعتینی ائتدیگینی بیلدیرن چاووش‌اوغلو، قاتیلیم اوچون سندلری بو اولکه‌یه گؤندردیکلرینی و رسمی سۆره‌جی تاماملایاقلارینی ایفاده ائتدی.
چاووش‌اوغلو،
"ایلک دفعه تورکمنیستان‌دان دا مثبت سیگنال آلدیق. گؤزلمچی عضو اولاراق باشلاماق ایسته‌دیکلرینی دئدیلر" دئیه دانیشدی.
تورک کنه‌شی (شوراسی) باش کاتیبی قازاق ائلچی باغداد امره‌یئو و یاردیمچیسینین تورکمنیستانا گئده‌جکلرینی بیلدیرن چاووش‌اوغلو، هؤرگوتون اؤنملی بیر بؤلگه‌سل آکتیر اولاجاغینی وورغولادی.
گئچن ایل ایسیک گؤل‌ده ائدیلن توپلانتیدا ماجاریستانین گؤزلمچی عضو اولدوغونو خاطیرلادان چاووش‌اوغلو، ۱۹ سپتامبردا ماجاریستانین باشکندی بوداپست‌ده تورک شوراسینین آوروپا مرکزینی دیگر عضو اؤلکه‌لرین خاریجی ایشلر باخانلارینین قاتیلیمی ایله آچاجاقلارینی بیلدیردی.
