آذربایجاندان فرانسه‌یه خبردارلیق

آذربایجان: فرانسه‌نین قانلی هوجوملار تجروبه‌سی اولان ارمنیستانی یئنیدن سیلاحلاندیرماسی، ایروان رهبرلیگینین اینتیقامچی سیاستینی دستکلمه‌سی هم سیاسی مسئولیت‌سیزلیکدیر، هم ‌ده یئنی موحاریبه‌یه یول آچیر

2154173
آذربایجاندان فرانسه‌یه خبردارلیق

آذربایجان فرانسه‌نین ارمنیستانا سزار توپچو سیستمی ساتماسینا عکس‌العمل وئریب.

آذربایجان مودافیعه ناظیرلیگینین بَیاناتیندا بیلدیریلیب کی، آذربایجانین خبردارلیقلارینا باخمایاراق ارمنیستانا اؤلدوروجو هوجوم سیلاحلاری وئریلمه‌سی فرانسه‌نین گونئی قافقازدا تخریبات کاراکترلی فعالیتینین اثباتیدیر.

بَیاناتدا فرانسه‌ مودافیعه ناظیرلیگینین 2023-جو ایلده ارمنیستانا یالنیز مودافیعه مقصدی ایله سیلاح وئره‌جکلرینی بَیان ائتدیگی، لاکین اؤلدوروجو سیلاحلار تقدیم ائتدیکلری و بو وضعیتین فرانسه‌نین «ریاکارلیغینین داها بیر تظاهرو» اولدوغو خاطیرلادیلیب.

بَیاناتدا «گونئی قافقازدا میلیتاریزاسیون و ژئوسیاسی فتنه سیاستی یورودن (فرانسه‌ پرزیدنتی امانوئل) ماکرون رژیمی ارمنیستان و آذربایجان آراسیندا نورماللاشمایا و بؤلگه‌ده داواملی صلحون برقرار اولماسینا انگل تؤره‌دیر." دئییلیب.

ارمنیستانین ایشغالچی دؤولت اولدوغو بیلدیریلن آچیقلامادا «بیرلشمیش میللتلر تشکیلاتینین تهلوکه‌سیزلیک شوراسینین دایمی عوضوو اولان فرانسه‌نین قانلی هوجوملار تجروبه‌سی اولان ارمنیستانی یئنیدن سیلاحلاندیرماسی، ایروان رهبرلیگینین اینتیقامچی سیاستینی دستکلمه‌سی هم سیاسی مسئولیتسیزلیکدیر، هم ‌ده یئنی موحاریبه‌یه یول آچیر.» ایفاده‌سی ایشلدیلدی.

آچیقلامادا فرانسه‌نین استعمارچیلیق سیاستی خاطیرلادیلیب و یئنی کالدونیا و فرانسه‌نین دیگر دنیز اؤته‌سینده‌کی بؤلگه‌لرینده اعتیراضلارین سیلاح گوجو ایله یاتیشدیریلماسینین «ماکرون رژیمی»نین اصل سیماسینی اورتایا چیخاردیغی قید ائدیلیب.

فرانسه‌نین آذربایجانا قارشی قارا تبلیغات و یالان خبر یایما کامپانیاسی آپاردیغی بیلدیریلن بَیاناتدا، «گونئی قافقازدا وضعیتین گرگینلشمه‌سینه و یئنی موحاریبه منبعینین یارادیلماسینا گؤره مسئولیت ایروان رهبرلیگی و قیصاصچی سیاست یورودن ماکرون دیکتاتورلویونون اوزرینه دوشه‌جک.» ایفاده‌لردن ایستیفاده اولوندو.

فرانسه‌نین مودافیعه ناظیری سباستیان لکورنو و اونون ارمنی همکاری سورن پاپیکیان ارمنیستانا «سزار» توپچو سیستمینین ساتیشینا دایر موقاویله ایمضالاییبلار.

سزار توپچو سیستملری فرانسه‌نین مودافیعه صنایع شیرکتی نکستر طرفیندن ایستحصال اولونور.



ایلگیلی‌لی خبرلر