تاتار تورکلری سورگونو قوربانلارینی آندی
"قیریم تاتار خالقی اوچون ۱۸ می تاریخی حوزن گونو اولماقلا یاناشی هر زامان قیریم تاتارلارینین بیرلشدیگی گوندور"
قیریم تاتار تورکلرینین لیدئری، اوکراینا میلت وکیلی مصطفی عبدالجمیل قیریم‌اوغلو، ۱۸ می‌ین قیریم تاتارلاری اوچون حوزن گونو اولماقلا یاناشی اونلاری بیرلشدیردیگینی ده بیلدیردی.
قیریم‌اوغلو، "۱۸ می ۱۹۴۴ قیریم تاتار تورکلری سورگونو قوربانلارینین آنما گونو" موناسیبتیله بیر مئساژ یایینلادی.
قیریم تاتار تورکلری اوچون ۱۸ می‌ین بیر چوخ باخیم‌دان اؤنم‌لی اولدوغونو بیلدیر‌ن مصطفی عبدالجمیل قیریم‌اوغلو،
"قیریم تاتار خالقی اوچون ۱۸ می تاریخی حوزن گونو اولماقلا یاناشی هر زامان قیریم تاتارلارینین بیرلشدیگی، حاقلاری اوچون، وطنینه دؤنمک اوچون مباریزه ائتمه قرارلیغینی نوماییش ائتدیردیگی بیر گون اولموش‌دور" ایفاده‌لرینی ایشلتدی.
ایشغال‌چیلارین هله ده قیریم تاتارلارینی بؤلمه و یا بیر سیرا آزادلیقلاری قاداغان ائتمه جهدین‌ده اولدوغونا دقت چکن قیریم‌اوغلو، بونا باخمایاراق، بو گون قیریم تاتار خالقینین بیرلیگینین حس ائدیلدیگینی قید ائتدی.
قیریم تاتار میلی مجلسینین باشقانی رفعت چوباروو ایسه اوکراینانین باشکندی کیئوده، قیریم تاتار تورکلری سورگونونون ۷۴.جو ایلی موناسیبتیله تشکیل اولونان مراسیم‌ده ائتدیگی چیخیشین‌دا، قیریم تاتار خالقینا اؤزارکلیک ایستاتوسو وئریلمه‌سی لازیم اولدوغونو سؤیله‌دی.
اوکراینادا یئرلی خالق اولاراق اؤز مقدراتینی تعیین ائتمه حقوقونون تام معنادا حیاتا گئچیریلمه‌سی حالین‌دا قیریم تاتار خالقینین حاقلارینین اعاده ائدیلمیش اولاجاغینا دقت چکن چوباروو،
"اوکراینانین آیریلماز پارچا‌سی کیمی قیریم تاتار میلی و بؤلگه‌سل اؤزارکلیگی، قیریمین ایشغالینا سون وئرمه‌یه یؤنه‌لیک گرچک و تأثیرلی بیر آددیم اولاجاق‌دیر" شکلینده دانیشدی.
۱۹۴۴ده حیاتا گئچیردیگی قیریم تاتار تورکلری سورگونونون ایستالین رژیمینین اینسان‌لیق‌دان نیفرت ائتمه سیاستینین گؤستریجی‌سی اولدوغونو وورغولایان چوباروو، بو سورگون ایله مینلرجه قیریم تاتارینین حیاتینی ایتیردیگینی و قدرینین دییشدیگینی دیله گتیردی.
