محمد حسین شهریار آذربایجانین قودرت‌لی سؤز صنعتکاری آنکارادا خاطیرلاناجاق

شهریار ادبی-هنری گئجه‌سینه هر کس دعوت‌لی‌دیر

تورکسوی 2017-جی ایلده یئنی بیر پروژه‌یه باشلادی. ت.ر.ت “تورکیه‌نین سسی” سایتینا تورکسوی-ون آذربایجان نماینده‌سی ائلچین قافارلی اؤزل موصاحیبه ‌ده معلومات وئردی.

هر آی بیر داهی.

ائلچین قافارلی، تورکسوی-ون آذربایجان نماینده‌سی: “2017-جی ایلین ژانویه‌دن باشلایا‌راق هر آی تورکیه- آنکارادا بوتون تورک دونیاسی‌نین گؤرکم‌لی شخصیت‌لرین‌دن بیری یادا سالینا‌جاق، بؤیوک و تانینمیش سیما‌لار کونفرانس، پانئل و سمپوزیوم تدبیرلر سیلسیله‌سیله خاطیرلانا‌جاق.

ایکینجی بئله تدبیرلر سریسینده تورک دونیاسی‌نین بؤیوک شاعری شهریار وار. محمد حسین شهریار آذربایجانین قودرت‌لی سؤز صنعتکاریدیر.      تورکسوی ایلین ایکینجی کونفرانس-ادبی- هنری گئجه‌سینی اونون حیات و یارادیجی‌لیغینا حصر ائدیب. باشکند باکی‌دان – آذربایجان دولت ادبیات اونیورسیته‌سی‌نین پروفسورو ائلمان قولیئو گله‌جک و بو کونفرانسی او آپارا‌جاق. ائلمان قولیئو شهریار یارادیجی‌لیغی‌نین آذربایجان جمهوریتینده ان یاخشی آراشدرماچیلاریندان‌ بیری‌دیر، علمی ایشی، درجه‌سی بؤیوک شاعرله باغلی‌دیر.

شهریارین شعرلرین‌دن و سؤزلرینه یازیلمیش ماهنی‌لاردان عبارت ادبی-موسیقی‌لی تدبیر 16 فوریه ساعت 14.00-دا آنکارا تورکسوی-ون بیناسیندا اولا‌جاق. آچیق دعوت‌دیر، خصوصی دوتنامه‌یه احتیاج یوخدور، یعنی هر کس گله بیلر. شهریار پوئزیاسی، شهریار دونیاسی، شهریار وطن‌سئورلیگیله ماراق‌لانان‌لار، بویورسون‌لار، گلسین‌لر، توککسوی-اون قاپی‌سی آچیق‌دیر.

تدبیرین سونوندا تورکیه‌ده یاشایان جنوبی آذربایجان‌لی موغننی یانار سؤنمز ده چیخیش ائده‌جک. (او، دنیزلیده یاشاییر.) عینی زاماندا، آنکارا اونیوریسته‌لرینده اوخویان اؤیرنجی‌لر بؤیوک شاعرین شعرلرینی سؤیله‌یه‌جک‌لر.

شهریار ادبی- هنری- موسیقی‌لی گئجه‌سی معروضه، سوال-جواب بؤلوملریندن عبارت اولا‌جاق.”

قید ائدک کی، شهریارلا باغلی تدبیر اسکیشهیرده ده اولا‌جاق، فوریه‌‌نین 17-سی شهرین آنادولو اونیورسیته‌سینده، ساعت 15.00-ده.

خاطیرلاداق کی، داها چوخ شهریار تخللوصو ایله تانینان، شعرلرینی آذربایجان تورکجه‌سی و فارس دیل‌لرینده یازمیش بؤیوک آذربایجان شاعری سید محمد حسین بحهجتی تبریزی 1906-جی ایلده ایرانین شرقی آذربایجان ایالتی‌نین باشکندی تبریزده دونیایا گلیب.

محمد حسین شهریارین وفات ائتدیگی گون، 18 سپتامبر هر ایل جنوبی آذربایجاندا و ایراندا میلی شعر گونو کیمی قوتلانیر.

سن‌دن آیری دوشسم ده من، عشقین ایله یاشاییرام،

یارالانمیش قلبیم کیمی، قلبی ویران آذربایجان...

وطن عشقی مکتبینده جان وئرمگی اؤیرنمیشیک،

اوستادیمیز دئییب هئچ‌دیر وطن‌سیز جان، آذربایجان!

شهریارین اوریی ده سنینکی تک یارا‌لی‌دیر،

آزادلیق‌دیر منه ملهم، سنه درمان آذربایجان!

قید ائدک کی، شهریار ادبی-هنری گئجه‌سینه هر کس دعوت‌لی‌دیر