ارمنیستان حکومتی قوندارما "د.ق.ج"-نین تانینماسی ایله باغلی قانون لاییحهسینه رای وئردی
اینترفاکس خبر آژانسی ارمنیستان حکومتینین قوندارما "داغلیق قاراباغ جمهوریتی"نین موستقیللیگینین تانینماسینی نظرده توتان قانون لاییحهسینه رای وئرهرک سندی پارلامنته گؤندردیگیندن یازیر
قوندارما “داغلیق قاراباغ جمهوریتی”نین تانینماسی ایله باغلی قانون لاییحهسی میین 10-دا ارمنیستان پارلامنتینین فوق العاده ایجلاسیندا مذاکیره اولوناجاق.
قید ائدک کی، ارمنیستاندا مخالیفتدکی ارث پارتیسی بؤلگهنین مستقیللیگینین تانینماسی اوچون 2009-جی ایلدن اعتباراً بیر نئچه دفعه قانون لاییحهسی تقدیم ائتمیش،لاکین بو لاییحهلر حاکم ارمنیستان رجمهوریتچیلر پرتیسینین تلاشلاری نتیجهسینده گئری قایتاریلمیشدی.
داغلیق قاراباغ بؤلگهسینده آذربایجان و ارمنی گوجلری آراسیندا کئچن آی اونلارلا آدامین اؤلومونه سبب اولان شدتلی توققوشمالار باش وئرمیشدی.
طرفلر 4 گون داوام ائدن چاتیشمالاردان سونرا روسیانین واسیطهچیلیگی ایله آوریلین 5-سینده آتشکس مقاویلهسی ایمضالامیشدی.
ارمنیستان پرزیدنتی سرژ سرکیسیان چاتیشمالار باشلایاندان سونرا وئردیگی آچیقلامادا ساواش اولماسی حالیندا داغلیق قاراباغی تانییاجاقلارینی بیلدیرمیشدی.
داغلیق قاراباغ مناقیشهسینین معاصر مرحلهسی 1988-جی ایلده ارمنیستان اس.اس.ر-ین آذربایجان اس. اس ر-ه قارشی اراضی ادعالاری اثاسیندا باشلاییب. 1991-1994-جو ایللرده آذربایجانین داغلیق قاراباغ اراضیسی اوغروندا ارمنیستانلا آذربایجان آراسیندا شدتلی ساواش باش وئریب. نتیجهده آذربایجان اراضیلرینین 20 فایزی - داغلیق قاراباغ و اطراف 7 اوستان (لاچین،کلبجر، آغدام، فضولی، جبراییل، قوبادلی،زنگیلان) ارمنیستان سلاحلی گوجلری طرفیندن ایشغال اولونوب، 1 میلیوندان آرتیق اینسان قاچقین و مجبوری کؤچکون وضعیتینه دوشوب. نیظامی عملیاتلار 1994-جو ایلین می آییندا بیشککده آذربایجان و ارمنیستان آراسیندا ایمضالانمیش آتشکس سازیشی ایله باشا چاتیب.
داغلیق قاراباغ موناقیشهسینین حلّی ایله اوروپا ایش بیرلیغی تشکیلاتی-نین مینسک قروپو مشغول اولور. قروپ اوروپا ایش بیرلیغی تشکیلاتی-ین ناظیرلر شوراسینین 1992-جی ایلین 24 مارسیندا هلسینکیده کئچیریلمیش گؤروشونده یارادیلیب. قروپون عضولری آذربایجان، ارمنیستان، روسیا، آمریکا، فرانسا، ایتالیا، آلمان، تورکیه، بلاروس، فنلاند و سوئددیر.
1996-جی ایلین دسامبریندان اونون روسیا، آمریکا و فرانسادان عبارت همصدرلیک انستیتوسو فعالیت گؤستریر.
ارمنیستان قوشونلارینین داغلیق قاراباغدان قید-شرطسیز چیخاریلماسی ایله باغلی بیرلشمیش میللتلر امنیت شوراسینین 1993-جو ایلده قیسا فاصیلهلرله قبول ائدیلمیش 822، 853، 874 و 884 سایلی قطعنامهلری، او جملهدن بیرلشمیش میللتلر باش قورولو و دیگر تشکیلات و قوروملارین قطعنامهلری موجوددور.