عباس لسانی آجلیق اعتصابینا باشلادی
عباس لسانی، حبس‌خانا سوروملولارینین اینجیدیجی داورانیشلاری و بندین امکانلارینین آزلیغی ندنی ایله اعتصابا باشلادی
آذربایجان‌لی تورک فعال عباس لسانی آجلیق اعتصابینا باشلادی.
تیر آیی‌نین سون گونلرینده توتوقلانان و اردبیل زندانی‌نین 7.جی بندینه گؤندریلن سیاسی فعال عباس لسانی، حبس‌خانا سوروملولارینین اینجیدیجی داورانیشلاری و بندین امکانلارینین آزلیغی ندنی ایله اعتصابا باشلامیش و حبس خانانینین قرنطینه‌سینه آپاریلمیشدیر.
هرانایا دانیشان عباس لسانی‌نین ائشی رقیه علیزاده، بو خبری دوفرولایاراق، اعتصابین ندنی‌نی، قالدیغی بؤلومده باشقا محبوسلار طرفیندن سرگیله‌نن اینجیدیجی داورانیشلار و امکانلارین قیسیدلانماسی اولاراق بیلدیردی.
خانم علیزاده‌نین دئدیگینه گؤره، 7.جی بندده سایی چوخلوغوندان محبوسلار یئرده یاتماغا بئله یئر تاپابیلمیرلر.
محکمه قراریندا تبعید جزاسی اولماماسینا باخمایاراق لسانی‌نین، اؤلکه‌نین گونئیینه تبعید ائدیله‌جگی ده حبس‌خانا مسئوللاری طرفیندن دیله گتیریلمیشدیر.
عباس لسانی، تیر آیی‌نین اوتوز بیرینده، کسیلن بیر ایللیک جزاسینی چئکمک اوچون توتوقلانمیشدی.
