آنکارادا دوکتور جواد هئیت‌ین خاطره‌سینه حصر اولونان کونفرانس کئچیریلدی
توپلانتیدا اونون اثرلری، باره‌سینده یازیلمیش مونوقرافی‌لر و "وارلیق" درگیسی سای‌لاری سرگیلنیب
"تورک دیلی‌نین وارلیغی 5-جی تورکولوژی گونو" مناسیبتیله آنکارا اونیورسیته‌سی‌نین دیل و تاریخ-جوغرافیا فاکولته‌سی‌نین فارابی سالونوندا تانینیمیش عالیم دوکتور جواد هئیت‌ین خاطیره‌سینه حصر ائدلن علمی-کونفرانس کئچیریلیب.
05.05.2015، ده گئچیریلن تدبیره تورکیه اونیورسیته‌‌لری و آذربایجان میللی علم‌لر آکادئمیسی‌نین عالیم‌لری قاتیلیب.
چیخیش ائدن‌لر دوکتور جواد هئیت‌ین شخصیتی، تورکولوژی ساحه‌سین‌دکی فعالیتی، خصوصیله ایران-آذربایجان تورک‌لرینه یؤنلیک بؤیوک خیدمت‌لرین‌دن دانیشیب‌لار.
کونفرانسین آچیلیشیندا دوکتور رضا هئیت، دیل و تاریخ-جوغرافی فاکولته‌سی‌نین باشقان معاوینی پروفسور گولسون لیلا اوزون، معاصیر تورک لهجه‌لری و ادبیاتی بؤلومونون باشقانی پروفسور دوکتور سما باروتجو اؤزؤندر چیخیش ائدیب.
داها سونرا کونفرانس ایکی آیری بؤلومده داوام ائتدیریلیب.
پروفسور زینب کورکمازین صدرلیگی ایله کئچیریلن بیرینجی بؤلومده پروفسور احمد بیجان ارجیلاسون، عالیم‌لر سونل بوسنیا‌لی، پروانه مممدلی دوکتور جواد هئیت‌ین شخصیتی و تورک دونیاسین‌داکی اؤنملی یئری، ایراندا استاندارد تورک دیلی‌نین تشککولون‌دکی رولو و اونون ادبی فعالیتی حاقدا مقاله‌‌لر اوخویوب‌لار.
ایکینجی بؤلوم احمد بیجان ارجیلاسونون باشقانلیغیندا کئچیریلیب. بو بؤلومده عالیم‌لر آرتوم دینج، بابک جاوانشیر و رضا هئیت ایراندا فارسلاشدیرما سیاستی، اورادا یاشایان تورک‌لرین اتنو-سوسیال قورولوشو و ایراندا تورک یازیلی دیلی‌نین گلیشمه پروسه‌سی قونولاریندا چیخیش ائدیب‌لر.
توپلانتیدا دوکتور جواد هئیت‌ین اثرلری، باره‌سینده یازیلمیش مونوقرافیا‌لار و "وارلیق" درگی‌سی‌نین سای‌لاری سرگیلنیب.
