بیر ارمنی عسگری آذربایجان عسگرلرینه تسلیم اولدو

بیر ارمنی عسگری آذربایجان عسگرلرینه تسلیم اولدو
مارتین 22سینده گون اورتا ساعات‌لاریندا ایلک بیلگیلره گؤره 1991.جی ایلده خوجاوندده آنا‌دان اولموش، ارمنیستان سلاح‌لی گوج‌لری‌نین عسگری، آندرانیک آراراتوویچ قریقوریان کؤنول‌لو اولاراق آذربایجان طرفینه تسلیم اولدو.
آذربایجان جمهوریتی ساوونما باخانلیغی، قوشون‌لارین تماس خطینی گئچن ارمنی عسگرین آذربایجان عسگرلری طرفین‌دن توتولدوغونو بیلدیردی.
آندرانیک قریقوریان، "من 1991.جی ایلده مارتونی‌ده آنا‌دان اولموش آندرانیک آراراتوویچ قریقوریانام. 22 مارس 2015.جی ایل تاریخینده کؤنول‌لو اولا‌راق آذربایجان طرفینه گئچمیشم. بونون چوخ ساده بیر سببی وار. من معنا‌سیز یئره اؤلمک‌دن قورخورام. جبهه خطینی گئچنده من تک دئییلدیم. منیمله سیزین طرفه گئچمه‌یه جهد گؤسترن بیر نفر ده وار ایدی. من داها جلد ترپندیم. سلاحی آتیب سیزه طرف گلدیم. اونون طالعیین‌دن خبریم یوخ‌دور. سانیرام، آرتیق ساغ دئییل. نه قدر ارمنی حاکمیتی اؤز خالقین‌دان بو حادثه‌نی گیزلتمک ایسته‌سه ده آرتیق هامی بیلیر. معنا‌سیز تشکیل اولونموش تخریبات زامانی 20دن آرتیق اؤلو، اونلارجا یارا‌لی وار. عسگر چاتیشمادیغینا گؤره پوست‌لارا سیویل‌لری یئرلشدیریرلر. من اونلارین چیرکین اویون‌لاری‌نین سیراداکی قوربانی اولماق ایستمیرم" دئدی.