تورک دیل قورومو قورولمایاجاق
روحانی‌نین آزینلیق ایشلری اؤزل یاردیمچیسی علی یونسی، تبریزده تورک دیل قورومونون قورولمایاجاغینی سؤیله‌دی
ایران جمهورباشقانی حسن روحانی بو وظیفه‌یه سئچیلمه‌دن اؤنجه سئچیم گزی‌لری چرچیوه‌سینده گئتدیگی تبریزده، تورک دیل قورومونون قورولماسی سؤزونو وئرمیشدی. روحانی دانیشماسیندا "تدبیر و امید دؤولتینده آذربایجان اوچون آذری(تورک) دیل و ادبیاتی قورومونون تبریزده قورولماسینا شاهید اولاجاییق" دئمیشدی. بو سؤزلر آذربایجان تورکلری طرفیندن اومود و سئوینجله قارشیلانیرکن بیر یاندان دا چوخجا تپکی چئکمیشدی.
اؤته یاندان تبریز والی‌سی اسماعیل جباری ده اؤنجه‌لیگینین تبریزده تورک دیل قورومونون قورولماسی اولودوغونو سؤیله‌یرک روحانی‌نین بو وعده‌سینی عملی ائتمک قونوسوندا آذربایجانلی‌لارا سؤز وئرمیشدی.
بو وعده‌نین اوزریندن تام بیر ایل گئچمیش اولسا دا بو قونودا هله هر هانسی بیر آددیم آتیلمامیشدیر.
گئچدیگیمیز گونلرده تبریزه گئدن روحانی‌نین آزینلیق ایشلری اؤزل یاردیمچیسی علی یونسی ایسه بو وعده‌نین گرچکلشمه‌یه‌جگینی سؤیله‌دی. عصر آزادی گؤنده‌لیگینین سورولارینی یانیدلایان یونسی "آذری(تورک) دیل قورومونون قورولماسی تاساریسی باشیندان دوغرو دئییلدی، قونونو باشقا شکیلده اورتایا آتمالاری گرکیردی. بیلدیگیم قدری ایله، بو ایشی بیر فرهنگی بنیاد بنیه‌سینده یئریده‌جک‌لر" دئدی.
یونسی بو دانیشیقدا، ایران دا فرقلی ائتنیک و دینی قروپلارین بیربیرلری ایله هر هانسی بیر سورونو اولمادیغینی ساووناراق، آزینلیقلار قونوسونا امنیتی آچیدان باخمانین دا دوغرو اولمایاجاغینی سؤیله‌دی.
"ایران ائشیددیر فارس" باخیش‌آچیسینی ساوونان یونسی‌یه گؤره، فارسی بیر ائتنیک قروپ سویه‌سینه ایندیرگه‌مک خطا و ظلم ساییلار، ترسینه فارسی بؤیودمک ده باشقا ائتنیک قروپلاری آشاغیلاماق آنلامینا گلمز. یونسی سؤزلرینین داوامیندا "فارس دیلی باشقا دیللرین یانی سیرا، ایرانا ائشید اولان فارس‌ین چتری آلتیندادیر" دئدی.
