آمریکا "شکر ائتدی"، نفت باها‌لاشدی

آمریکا-دا شکران‌لیق گونو موناسیبتیله بورسالارین ایشلممه‌سی نفتین قیمتینه پوزیتیو تأثیر گؤستریب. لندن بورساسیندا سون 24 ساعت عرضینده "برنت" مارکا‌لی نفتین قیمتی 63،57 دو‌لارا کیمی یوکسلیب. سحر سئانس‌لاریندا ایسه قیمت‌لر 63،41 دو‌لار سویه‌سینه ائنیب. غربی تگزاس نفتی ده دیر قازانماقدا داوام ائدیر. بو سحر کئچیریلن معامه لرده  WTİ مارکا‌لی نفتین بیر بوشقاسی 58،53 دو‌لاردان ساتیلیر، ایکی مارکا آراسیندا فرق ایسه اوزون مدت‌دن سونرا ایلک دفعه 5 دو‌لاردان آز اولوب. بو، نفتین باهالاشماسینا رغمن قیمت‌لرین فورمالاشماسیندا آمریکا قایناق‌لی عامل‌لرین رولونون گوجلنمه‌سی دئمک‌دیر.

بو عامل‌لردن بیری اؤتن هفته آمریکادا نفت ذخیره لری‌نین حجمی‌نین آزالماسی‌دیر. انرژی ناظیرلیگی‌نین رسمی راپورونا اساساً، اؤلکه‌ده 457 میلیون بوشقا خام نفت ذخیره سی قالیب، هفته عرضینده ذخیره لرین حجمی 1،9 میلیون بوشقا آزالیب. ایستراتژی نفت ذخیره لری‌نین ایسه 1،7 میلیون بوشقا آزالدیغی آچیقلانیب.

بو گون بورسالاردا هفته‌نین سون تیجارت معامله لری کئچیریله‌جک. یئکون قیمت‌لره تأثیر گؤستره‌جک عامل یئنه ده آمریکادا قایا نفتی اوره تیمینه جلب اولونان قویولارین سایینا دایر راپور اولا‌جاق. سون هفته عرضینده قیمت‌لرین یوکسک حده قالماسی آمریکا و کانادادا نفت اوره تیمینی ثابتلشدیریر،  بو سبب‌دن قویولارین سایی‌نین بو هفته ده آرتماسی گؤزلنیلیر. اؤتن هفته آمریکادا گونده‌لیک اوره تیم حجمی 9،65 میلیون بوشقایا یوکسلیب کی، بو دا سون ایکی ایلین ان رکورد گؤستریجی‌سی‌دیر