اسرائیل- فلیسطین ساواشیندا سون دوروم
اسرائیلین سالدیریلاریندا ۱۵۰ نفردن عبارت اولان فیلیسطینلی ۲۲ عائلهنین تامامیله قتل ائدیلدیگی ایفاده ائدیلدی
اسرائیلین، محاصره آلتینداکی غزهده ۵.جی گونونه گیرهن هاوا سالدیریلاریندا ۹۵۰ نفر حیاتینی ایتیردی، ۵ مین نفر ده یارالاندی.
اسرائیل ساواش اوچاقلاری، غزهنین قوزئییندهکی بیت لحیه بؤلگهسینه، غزه شهرینین باتیسینا و خان یونوس شهرلرینه دونن گئجه ده هاوا سالدیریلاری تشکیل ائتدی.
غزهدهکی ساغلیق باخانلیغی، اسرائیلین سیخ سالدیریلاری آلتینداکی غزهده حیاتینی ایتیرهنلرین ساییسینین ۲۶۰ی اوشاق، ۲۰۰و قادین اولماق اوزره ۹۵۰یه، یارالی ساییسینین دا ۵ مینه چیخدیغینی بیلدیردی.
آچیقلامادا، اسرائیلین سالدیریلاریندا ۱۵۰ نفردن عبارت اولان فیلیسطینلی ۲۲ عائلهنین تامامیله قتل ائدیلدیگی ایفاده ائدیلدی.
اسرائیلین ساغلیق چالیشانلارینی دا هدف آلدیغینا ایشاره ائدیلهن آچیقلامادا، بو آنا قدر ۶ ساغلیق چالیشانینین اؤلدورولدوگو، ۱۵ینین ده یارالاندیغی قید ائدیلدی.
غزهدهکی حکومت مطبوعات اوفیسی ایسه اسرائیل سالدیریلاریندا ۸ ژورنالیستین حیاتینی ایتیردیگی، ۱۰ ژورنالیستین یارالاندیغی، ۲ ژورنالیستین ده ایتکین اولدوغو بیلگیسینی وئردی.
اسرائیل اوردوسو غزهده ایسلام اونیوئرسیتهسینه ده هاوا سالدیریسی تشکیل ائتدی.
آغیر بومباردمان نتیجهسینده ایسلام اونیوئرسیتهسی یئرلشکهسیندهکی بینالار یئرله بیر اولدو.
غزهدهکی سیویل ساوونما مودورلوگو، اسرائیل بومباردمانی نتیجهسینده ییخیلان ائولرین چوخلوغوندان اؤترو قروپلارینین یئترسیز قالدیغینی بیلدیردی.
غزهنین باتیسینداکی محلهلرده یاشایان خالقین، اسرائیل ساواش اوچاقلارینین آغیر بومباردمانی سببی ایله، ائولریندن چیخاراق، شهرین مرکزینه سیغیندیغی بیلدیریلدی.
محاصره آلتینداکی غزهدن تشکیل ائدیلهن سالدیریلاردا اؤلن اسرائیللیلرین ساییسینین ۱۲۰۰ نفری آشدیغی بیلدیریلدی.
یدیعوت آحرانوت قزئتینین اسرائیللی مقاملارا دایاندیردیغی خبرده، حماسین سلاحلی قانادی عزالدین قسام توغایلارینین محاصره آلتینداکی غزهدن اسرائیله باشلاتدیغی "اقصی توفانی" سالدیریسیندا اؤلو ساییسینین، گونجل بیلگیلره گؤره ۱۲۰۰دن چوخ اولدوغو ایفاده ائدیلدی.
خبرده، سالدیریلار سیراسیندا حماسین اسیر آلدیغی اسرائیللیلرین ساییسینین دا ۲۰۰دن چوخ اولدوغونون تخمین ائدیلدیگی ایفاده ائدیلدی.
اسرائیل اوردوسو ایسه جمعه ائرتهسی سحریندن بو یانا اؤلدورولهن عسگرلرینین ساییسینین ۱۶۹ اولدوغونو بیلدیردی.
اسرائیل اوردوسوندان وئریلهن آچیقلامادا آیریجا، حماسین اسرائیله ۴ مین ۵۰۰ راکت آتدیغی، اؤزلرینین ایسه غزهده ۲ مین ۳۲۹ هدف ووردوغو قید ائدیلدی.
حماسین عسگری قانادی قسام توغایلاری، جمعهائرتهسی گونو اسرائیله "الاقصی توفانی" آدلی احاطهلی بیر سالدیری باشلاتدیغینی بیلدیرمیشدی. غزهدن اسرائیله مینلرجه راکت آتیلارکهن سلاحلی قروپلار دا بؤلگهدهکی یئرلهشیم یئرلرینه گیرمیشدی.
اسرائیل اوردوسو دا ساواش اوچاقلاری ایله غزهیه دمیر قیلینجلار عملیاتی باشلاتدیغینی آچیقلامیشدی.