دؤیوش‌لر آذربایجان اوردوسونون اوستون‌لوگو ایله داوام ائدیب
گئجه عرضینده بوتون جبهه بویو گرگین دؤیوش‌لر آذربایجان اوردوسونون اوستون‌لوگو ایله داوام ائدیب.
آذربایجان اوردوسونون اراضی‌لرینی آزاد ائتمک اوچون باشلاتدیغی عکس-هوجوم عملیاتلاری اوکتبرین 8-ی گونون ایکینجی یاریسیندان باشلایا‌راق 9-و سحردک و گئجه عرضینده بوتون جبهه بویو داوام ائدیب.
آذربایجان اوردوسونون بؤلمه‌لری مهم ایستیقامت‌لرده دوشمنه آتش ضربه لری ائندیره‌رک اونون حرکت فعالیتینی تام محدودلاشدیریب و آکتیو‌لیگی‌نین قارشی‌سینی قطعیت ایله آلیب. گؤرولن تدبیرلر نتیجه‌سینده دوشمن قوشون‌لاری آراسیندا ایداره ائتمه و قارشی‌لیقلی علاقه ایتیب، بؤلمه‌لری آراسیندا نیظام‌سیزلیق یارانیب، شخصی هئیتی‌نین انتظامی پوزولوب، دؤیوش موضع لرینین ترک ائدیلمه‌سی کوتلوی حال آلیب.
آذربایجان مودافعه ناظیرلیگی‌نین مطبوعات خیدمتیندن بیلدیریلیب کی، دونن حیاتا کئچیریلن حربی عملیات‌لار زامانی آذربایجان اوردوسونون آتش ضربه‌سی نتیجه‌سینده ائرمنیستان سلاحلی قوه‌لری‌نین 5-جی داغاتیجی آلایی‌نین قرارگاه بیناسی داغیدیلیب. نتیجه‌ده بینادا اولان 10-جو داغاتیجی دیویزیانین قرارگاه رئیسی سرهنگ ساموئل قریقوریان آغیر یارالانیب، آلایین توپخانه رئیسی سرهنگ آرمان درمیان و خیلی سایدا حربی قوللوقچو محو ائدیلیب.
آذربایجان اوردوسونون خانکندی شهرینه ائندیردیگی آتش ضربه‌لریندن آغیر ایتکی‌لره معروض قالان ائرمنیستان سلاحلی قوه‌لری‌نین بورادا یئرلشن حربی حیسه‌لری‌نین شخصی هئیتی تخلیه ائدیلیر. خانکندی-ده یئرلشن حربی حیسه‌لردن بیری‌نین سیغیناجاغینا ائندیریلن توپ آتشی نتیجه‌سینده خیلی سایدا حربی قوللوقچو محو ائدیلیب و یارالانیب.
دونن گون عرضینده و اؤتن گئجه عمومی‌لیکده دوشمن‌ین 13 عدد T-72 تانکی، 2 عدد PDM-ی، 4 عدد BM-21 گراد یایلیم آتشلی رئاکتیو سیستمی، 2 عدد 2S3 "آکاسیا" اؤزویئریین توپ قورغوسو، 3 عدد D-30 اوبیتسا توپو، 2 عدد رادار سیستمی و خیلی سایدا حربی تجهیزات دقیق آتشله محو ائدیلیب و سیرا‌دان چیخاریلیب.
جبهه‌نین ایستیقامت‌لریندن بیرینده حیاتا کئچیریلن عملیات نتیجه‌سینده ائرمنیستان سلاحلی قوه‌لری‌نین 49-جو تانک بریقاداسینا مخصوص 6 عدد T-72 تانکی تام ایشلک وضعیتده اله کئچیریلیب.
