عراقدا گؤستریلر زامانی اؤلنلرین ساییسی 74ه یوکسلدی
آچیقلامادا، گؤستریجی و امنیت گوجلریندن اولماقلا یارالی ساییسینین ایسه 3654 اولدوغو ایفاده ائدیلدی
عراقدا حکومت علیهداری گؤستریلر زامانی اؤلنلرین ساییسی 74ه یوکسلدی.
عراق پارلامنتینه باغلی اینسان حاقلاری کومیسارلیغی طرفیندن ائدیلن یازیلی آچیقلامادا، باشکند بغداد و اؤلکهنین اورتا و جنوب شهرلریندکی سون 3 گونده میدانا گلن اعتراضلار زامانی اؤلنلرین ساییسینین 74ه چاتدیغی قئید ائدیلدی.
آچیقلامادا، گؤستریجی و امنیت گوجلریندن اولماقلا یارالی ساییسینین ایسه 3654 اولدوغو ایفاده ائدیلدی.
کومیسرلیک، امنیت گوجلرینی بغداد، میسا، بصره و ذیقار ویلایتلریندکی اعتراضلارین داغیتیلماسیندا گؤز یاشارتیجی گاز و سس بومباسی ایستیفاده ائتمکله گوناهلاندیردی. آیریجا بصره، ذیقار و بابیل ویلایتلرینده 153 نفرین نظارته آلیندیغی 123ونون سربست بوراخیلدیغی ایفاده ائدیلدی.
آچیقلامادا، گؤستریچیلرین آراسینا قاریشان شخصلر اؤزل و توپلوما عایید 90 بینانین یاندیریلدیغی یا دا تخریب ائدیلدیگی وورغولاندی.
باشکند بغداداکی حکومت علیهداری گؤستریلر 4. گونونده اونیورسیته طلبهلرینین ده قاتیلیمی بؤیویهرک داوام ائدیر.
اونیورسیتهلرده تعطیل اعلان ائدیلممهسینه باخمایاراق درسلر ائدیلمهدی. شاگیردلر باشکندده گؤستریلرین مرکزی حالینا گلن تحریر میدانینا دوغرو گئدیشه کئچدی. اونیورسیته شاگیردلرینه گؤز یاشارتیجی گازلا موداخیله ائدن امنیت گوجلرینین، تحریر میدانیندا توپلانان قروپلاری داغیتماق اوچون موداخیلهلری ده داوام ائدیر.
باش ناظیر عادل عبدالمهدینین نیظامی باش موشاویری عبدالکریم خلف، اونیورسیته طلبهلرینین کوچهیه چیخماسینا ایجازه وئرن اونیورسیته رهبرلیکلرینین جزالاندیریلاجاغینی بیلدیردی.
دیگر طرفدن، عراق تا داوام ائدن گؤستریلر سببیله 4 میللت وکیلی وظیفهسیندن ایستعفا ائتدی. عراق کومونیست پارتیسی عضولری و سائرون کوالیسیونو میللت وکیللری رائد فهمی و هیفاء الامین تشکیل ائتدیکلری اورتاق مطبوعات کونفرانسیندا، اؤلکهده داوام ائدن گؤستریلردکی طلبلرین حکومت طرفیندن یئرینه یئتیریلممهسی سببیله وظیفهلریندن ایستفا ائتدیکلرینی ائشیتدیردی.
بو آرادا، عراق مجلیسی بصره میللت وکیلی مزاحیم التمیمی ایله اسکی باش ناظیر حیدر العبادی لیدرلیگیندکی ناصر کوالیسیونو میللت وکیلی طه الدفاعی ده عینی سببله ایستعفا ائتدیگینی آچیقلادی.
عراقلیلار، ایشسیزلیک، روشوت و دولت خیدمتی یئترسیزلیگینی اعتراض مقصدیله اؤلکهنین فرقلی بؤلگهلرینده اعتراضلار تشکیل ائدیر.
1 اوکتوبر ده حرکته کئچن آکتیویستلر، اربعین مراسیملری سببیله آرا وئردیکلری اعتراضلارا دونن تکرار باشلادی.
باشدا بغداد اولماقلا اؤلکهنین اورتا و جنوب شهرلرینه یاییلان حرکتلرده اوکتوبر باشیندان بو یانا تخمینن 200 نفر اؤلدو، 8 مینه یاخین اینسان یارالانیب.