پوتین: آمریکا دمشقی ووراجاق
روسیا دؤولت باشقانی ولادیمیر پوتین، آمریکانین سوریهنین باشکندی دمشقین گونئیینی ووراجاغینا دایر استخبارات آلدیقلارینی سؤیلهدی
![پوتین: آمریکا دمشقی ووراجاق](http://cdn.trt.net.tr/images/xlarge/rectangle/4a3e/4074/493d/58ecd862be486.jpg?time=1719063421)
آمریکا ایله روسیا آراسینداکی سوریه گرگینلیگی آرتیر.
روسیا دؤولت باشقانی ولادیمیر پوتین، آمریکانین سوریهنین باشکندی دمشقین گونئیینی ووراجاغینا دایر استخبارات آلدیقلارینی سؤیلهدی.
آچیقلامانین، آمریکا خاریجی ایشلر باخانی رکس تیلرسونون موسکوایا دوغرو یولا چیخدیغی سیرادا ائدیلمهسی دقت چئکدی.
رسمی گؤروشمهلر اوچون موسکوادا اولان ایتالیا پرزیدنتی سرجیو ماتارلا ایله گؤروشوندن سونرا تشکیل ائدیلن مطبوعات کنفرانسیندا دانیشان پوتین، سوریه رژیمینین گئچن هفته ادلبده شیمیایی سلاح ایستیفاده ائتدیگی یولونداکی "ادعالاری تخریبات اولاراق" دگرلندیرهرک، بونو بیرلشمیش میلتلر تشکیلاتینا داشییاجاقلارینی دا ایفاده ائتدی.
روس لیدئر، بعضی شخصلرین ایندی ده سوریهنین دمشق اطرافی داخیل اولماقلا باشقا بؤلگهلرینده، سوچونو سوریه حکومتینه آتاجاقلاری تخریبات حاضیرلیغیندا اولدوقلارینا باغلی معلومات آلدیقلارینی سؤیلهدی.
پوتین بئله دانیشدی:
"موختلیف منبعلردن الده ائتدیگیمیز معلوماتلارا گؤره، اوخشار تخریباتلار -بونو باشقا شکیلده تعبیر ائتمک مومکون دئییل- دمشق اطرافی دا داخیل اولماقلا سوریهنین باشقا بؤلگهلرینده ده حاضرلانیر. بعضی مادهلر آتیب سوچو سوریه حکومتینه ییخماغی پلانلاییرلار."
روسیا باش قرارگاه باشقانلیغی آنا حرکات دایرهسی باشقانی ژنرال سرگئی رودسکوی دا، آمریکانین سوریهیه یئنی موشک سالدیریلاری تشکیل ائدهبیلهجگینی بیلدیردی.
روسیا خاریجی ایشلر باخانلیغی سؤزچوسو ماریا زاخارووا دا، آمریکا-روسیا گرگینلیگینی آرتیرابیلهجک بیر آچیقلاما وئردی.
روس سؤزچو، هفته سونونا دوغرو، روسیا، ایران و سوریه خاریجی ایشلر باخانلارینین اوچلو اوتوروم دوزنلمهیی پلانلادیقلارینی سؤیلهدی.