عبدالرحمانوف :"قازاخیستان سوریه گؤروشلری اوچون حاضردیر"
قازاخیستان خاریجی ایشلر ناظیرلیگی آستانادا کئچیریلهجک سوریه گؤروشلری اوچون تامامیله حاضر اولدوغونو آچیقلادی.
قازاخیستان خاریجی ایشلر ناظیرلیگی آستانادا کئچیریلهجک سوریه گؤروشلری اوچون تامامیله حاضر اولدوغونو آچیقلادی.
خاریجی ایشلر ناظیری کایرات عبدالرحمانوف طرفیندن وئریلن آچیقلامادا بیلدیریلدی کی، قازاخیستان گؤروش اوچون هر باخیمدان حاضردیر. حال-حاضردا پلانلاشدیریلان ییغینجاغین تشکیل ائدیلمه تاریخینین 23 ژانویه اولاراق نظره آلینماسی تکلیف ائدیلیر.
توپلانتی ایله علاقهلی هر شئیین ایشتیراکچی لیستهسی و فورماتین حاضیرلانماسیندان سونرا دقیقلشهجگینی سؤیلهین ناظیر وورغولادی کی، ییغینجاغین سویهسی ایشتیراکچیلاردان، تورکیه و روسیادان اولان هئیتلره کیمین باشچیلیق ائده جگیندن آسیلیدیر.
ایران نمایندهلری ده ییغینجاغا قاتیلماق ایستدیکلرینی بیلدیردیلر. گؤروشون باش توتاجاغی یئرین معین ائدیلمهسی گؤزلنیلیر.
قازاخیستان خاریجی ایشلر ناظیری ییغینجاغی تشکیل ائتمک اوچون کیفایت سویهده تجروبهلرینین اولدوغونو بیلدیرهرک، داها اول آلماتی-ده کئچیریلن اتم موذاکیرهلری و 2015-جی ایلده آستانادا کئچیریلن سوریه موضوع لو ایکی ییغینجاغی خاطیرلاتدی.
بو آرادا ناظیر بو گؤروشلرین هئچ بیر شکیلده سوئیس-ین ژنو شهرینده کی سوریه گؤروشلرینین یئرینه گئچمهیهجگینی وورغولادی.
قئید ائدک کی، خاریجی ایشلر ناظیری مولود چاووش اوغلو و جمهورباشقانلیغی سؤزچوسو ابراهیم کالین آستانا گؤروشلرینین 23 ژانویه ده کئچیریله جگینی آچیقلامیشدی.