شایگو:"سوریهده آتشکس اوچون شرایط یارانیب"
شویگو حلب-ده موخالیفلرین تخلیهسینین سونا چاتدیغینی خاطیرلاداراق، سوریه اراضیسینده آتشکسین تامین اولونماسی اوچون شرایطین یاراندیغینی سؤیلهدی.
روسیانین ساوونما ناظیری سرگئی شویگو سوریهدهکی وضعیتین آتشکسه چوخ یاخینلاشدیغینی دئدی.
روسیا پرزیدنتی ولادیمیر پوتین ایله گؤروشدوکدن سونرا آچیقلاما وئرن شویگو حلب-ده موخالیفلرین تخلیهسینین سونا چاتدیغینی خاطیرلاداراق، سوریه اراضیسینده آتشکسین تامین اولونماسی اوچون شرایطین یاراندیغینی سؤیلهدی.
سرگئی شویگو: " عملیات ایکی مرحلهلی اولاراق تورکیه و ایرانلی همکارلاریمیزلا قارشیلیقلی علاقه شرایطینده حیاتا کئچیریلدی. بوندان سونرا نوبتی مرحله گلمهلیدیر. منجه، سوریه تورپاقلاریندا تام آتشکسین تامین ائدیلمهسی مسئلهسینده راضیلاشما نقطهسینه گلمیشیک" دئدی.
روسیا خاریجی ایشلر ناظیری سرگئی لاوروف-ون معاوینی گنادی گاتیلوف ایسه، بوتون سوریه اراضیسینده تطبیق اولوناجاق آتشکس پلانینین، قازاخیستانین پایتاختی آستانادا کئچیریلهجک گؤروشلرده موذاکیره اولوناجاغینی سؤیلهدی.
اینترفاکس آژانسینا موصاحیبه وئرن گاتیلوف ژانویه آیینین اورتالاریندا تورکیه، ایران و روسیانین ایشتیراکی ایله دانیشیقلارین اساس موضوع سونون بوتون سوریه اراضیسینده آتشکسین تامین اولونماسی اولدوغونو بیلدیردی.
چرشنبه آخشامی گونو موسکودا کئچیریلن گؤروشلرده اوچ اؤلکهنین ساوونما و خاریجی ایشلر ناظیرلری: "سوریه ده باریشین تامین اولونماسینا قاتقی اوچون حاضیریق" دئمیشدیلر.
دیگر طرفدن، روسیا پرزیدنتی ولادیمیر پوتین کئچن هفته ژاپن-ا ائتدیگی سفرده آستانادا کئچیریلهجک دانیشیقلارین ژنو دانیشیقلارینین داوامی اولاجاغینی بیلدیرمیشدی.
پوتین آستاناداکی ایجلاسدا تورکیه پرزیدنتی رجب طیب اردوغانلا بیرلیکده سوریهده باریشین داوام ائتمهسی بارهده تکلیف ایرهلی سورهجکلرینی سؤیله میشدی.