Törkiyädän mizgellär 11

Bügenge yazmabıznı Xäzräti Möxämmädneñ “İmannan tış beräwgä dä sälamätlektän başqa xäyerle niğmät birelmägän” digän süzşlare belän başlap cibaräbez ikän, bu yuqqa ğına tügel. Çönki bügen Törkiyäneñ sälamätlek turizmı tarmağındağı uñışları xaqında süz alıp barabız.Berniçä ğasır ütkännärgä küz salğanda bik küp xastalıqtan , mäsälän,tuberkulez, vaba, SPİD, yaman şeş häm simerüdän millionnarça keşeneñ ğomere özelüen küräbez. Monı qayçaq yazmış didelär, qaywaqıt naçar tuqlanu häm genetik faktorlarğa bäyläp kürsättelär. Meditsina däwalaw yulların ezläp taptı , xastalıqlardan saqlanu yulları tikşerep öyränelde häm ber mäs’älädä kileşü tä’min itelde:”Härkemneñ tabibı üze bulaçaq” .

Monnan yulğa çığıp adäm balası salämät yäşäw mäs’äläsen köndälek tormışnıñ ber öleşenä äwerelderde.

Sälamät yäşäw psixologik faktorlarnı da üz eçenä ala. Uñay äyberlär xaqında uylağız, çın duslar tabığız, yılmayığız , köndä kim digändä üzegezgä 15 minut waqıt tabığız digän kiñäşlär birä başladılar.

Bügenge köndä adäm balası üz tormışın ruxi häm fizik sälamätlegen saqlayaçaq räweştä qora. Eş şundıy xälgä kilde ki, qısqaça ğına äytkändä däwalanu maqsatlı säyäxätlär dip sälamätlek saqlaw turizmı tarmağı barlıqqa kilde. Törkiyäneñ sälamätlek saqlaw turizmı tarmağı här yıl 300 meñgä yaqın xalıqara xastanı qabul itä. Liviya, Germaniya, Ğiraq, Azärbaycan, Rusiya, Angliya, Hollandiya, Rumıniya, Bolgariya häm Norvegiyadan kilgän xastalar ayıruça küz awırtuları , travmatologiya, ginekologiya , onkologiya , xirurgiya tarmaqlarında däwalanunı saylıy. Plastik operatsiya , teş däwalaw häm başqa bik küp tarmaqnı üz eçenä aluçı sälamätlek saqlaw turizmında Törkiyä qunaqxanäläre , xastaxanäläre , termal çığanaqları belän xezmät kürsätä.

Dönya turizmında möhim urın alıp toruçı Törkiyä sıyfatlı meditsina xezmäte , köndäş bäyä östenlekläre , däwlät yaqlawı , geografik wäzğiyäte ,uñaylı klimatı , töreklärneñ qunaqçıllığı belän sälamätlek saqlaw turizmı tarmağında da aktivlığın arttıra.

Dönyada tabiği çığanaqlardan faydalanu , tabiği produktsiyälär belän tuqlanu häm çirlärne tabiği ısullar belän däwalawğa zur iğtibar birelä başladı. Küp kenä awırunı däwalaw öçen meditsina belän bergä tabiği çaralar da yış qullanıla. Bu räweşle Törkiyädä sälamätlek saqlaw turizmınıñ termal çığanaqlar tarmağı aktiv xälgä kilde. Törkiyäneñ 46 şähärendä 190 termal su qorılması bar.

Xalıqara xastalar Törkiyägä ayıruça küz awırtuların däwalaw , çäç küçerep utırtu operatsiyäläre häm yasalma yul belän bäbi tabu öçen kilä. Törkiyädä organ küçerep utırtu häm buın –protez operatsiyäläre dä uñışlı başqarıla.