Törkiyädän mizgellär 02

Bügenge yazmabıznı Möxämmäd päyğambärneñ “(Ramazan) häm Qorban bäyrämnärendä tönnären sawabın Allahtan ömet itep ğibadät belän ütkärüçe keşeneñ yöräge kalblär ülgän könne ülmäz”digän xädise belän başlap cibäräbez.

Möselmannarnıñ izge bäyrämnärennän ikençese bulğan Qorban bäyräme 4-7 oktyabr könnärendä qotlandı. Dini ğoref-ğadätlärgä kürä uzdı bäyräm:bäyräm namazları uqıldı, qorbannar çalındı, tuğan-tumaça, tanış-beleş, dus-iş ber-berseneň xälen beleşte, bäyräm belän qotladı, ber-bersenä üpkälägän keşelär duslaştırıldı.

Möselmannar fäqir yäisä taza tormışlı, yäşe-qartı Allah qarşında tigez buluların tağın ber qat xäterläde.

Täwlek buyı eş, mäktäp, öy, küñel açu, yoqı dip törle öleşlärgä bülengän ber könneñ nindi mäğnägä iyä buluı turında uylandı.Ğomumän tormışnı küzdän kiçerde nigezdä.

Köndälek eşlär, mäşäqätlär belän mäşğül bulğanda monnan tış tağın ber tormış buluın da aňladıq. Bez iğtibar itep citkermägän küpme mizgellär bar bu tormışta. Mäsälän, ber kön yaňğırda qalıp çılanğan telänçe balanıň ayaq kiyemnäre yırtıq ide. Başqa ber könne eş urınında öställärdäge tuzannarnı sörtüçe xatınnıň küzlärendä yäş bar ide. Küptän tügel maşina belän yanınnan uzğanda bärelä yazğan babaynıň härxäldä küzläre kürmi ide. Äni telefonda söyläşkändä “Kilep kitsäň äybät bulır ide” digän süzläre belän “Siňa ixtıyacm bar” dip äytergä telädeme yuğisä.

Äye, möselmannar bolar xaqında uylansın öçen bar bu bäyrämnär.Keşelär bolarğa iğtbar itsen, keşe bulunıň ähämiyäten, kiräklegen, mäğnäsen aňlasın, söygännäreneň, yaqınnarınıň qaderen belsen häm bu tormışta başqa can iyäläreneň dä yäşäwen xäterläsen dip, tormışıbız tınıç, matur bulsın , doşmanlıqlar, açu-kinä, usallıqlar betsen, bergälek- tatulıq xökem sörsen öçen bar bu bäyrämnär.

Sänäğätläşü, globalläşü, texnologiya zamanı digändä ğomerneň küp öleşeneň buşqa sarıf itelüen aňlamıy da qalabız. Buşqa uzğan waqıtnı kire qaytarıp alu mömkin tügel. Dinne, izgeleklärne , ğoref-ğadätlärne qabat öyränep alarnı ğamälgä aşıru keşe ruxına şifa bula ala.

Allah bezne yarlıqasın, kemne üpkälätkän bulsaq, barısı da bezne ğafu itsen. Keşelär bu dönyada keşeçä yäşäsen. Barlıq can iyäläre bu dönyada üzenä layıq urında bulsın. Uzğan Qorban bäyrämegz qotlı bulsın.

Bügenge yazmabıznı “Täwbä” süräseneň 40 nçı ayäte bulğan “Qayğırma, Allah bezneň belän “digän süzlär belän tögällibez. Sezgä tınıç, matur könnär teläp qalabız.