Tatarstan xäbärläre 62/2023
Tatarstan häm tatar dön'yasındağı qayber waqıyğalarğa qısqaça küzätü
Röstäm Miñnexanov Tatarstan Respublikası Konstituŝiyase köne belän täbrikläde
Tatarstan Respublikası Räise Röstäm Miñnexanov Tatarstan Konstituŝiyase köne uñayınnan möräcäğat’ itte.
“Xörmätle tatarstanlılar! Sezne Tatarstan Respublikası Kostituŝiyase köne uñayınnan ixlas yöräsktän täbrik itäm! Üzgäreşlär çorında qabul itelgän Kostituŝiya respublikanıñ küpmillätle xalqı ixtıyarı, anıñ totrıqlılıqnı saqlawğa häm soŝial’-iqtisadi üseşne nığıtuğa omtıluınıñ açıq gäwdäläneşe buldı.
Konstituŝiya bezne berläşterde, törle xalıqlar telläreneñ häm mädäniyätläreneñ üseşenä, ruxi yañarışqa bäräkätle êtärgeç birde, ictimağıy, milli-mädäni häm dini berläşmälärgä üzläreneñ êşçänlek yünäleşen bilgelärgä yärdäm itte. Urtaq tırışlıq belän bez millätlär häm dinnär arasında tatulıqnı tağın da nığıtuğa ireştek, ğadel tigezlekne saqlap, izge urınnarnı, arxitektura istäleklären häm tarix yädqarlärne torğızdıq.
Tatarstanlılarnıñ tırış xezmäte, iqtisad ölkäsendäge uñışları näticäsendä respublikabız alğa baruın däwam itä, barlıq soŝial’ yöklämälär ütälä.
Qaderle watandaşlar!
Sezne Tatarstan Respublikasınıñ däwlät bäyräme uñayınnan tağın ber qat qotlıym häm sawlıq-sälamätlek, kiläçäkkä yaqtı ömetlär, xezmät qazanışları, iminlek telim,” – diyelä qotlawda.
Qazanda “Yärdäm yänäşä!” fondı Fälästin öçen 7 tonnadan artıq gumanitar yök cıydı
Qazanda “Yärdäm yänäşä!” fondı 3 noyabr’dän Ğazzäneñ tınıç xalqı öçen gumanitar yärdäm cıya başladı. Berniçä köndä 7 tonnadan artıq yök cıyıp alındı. 8 noyabr’dän soñ bolarnıñ barısı da Misırğa cibäreläçäk, annan “Qızıl ay” oyışması Fälästindä yäşäwçelärgä bülep biräçäk.
“3 noyabr’dän Tatarstan Fälästinneñ tınıç xalqı öçen gumanitar yärdäm cıyu akŝiyasenä quşıldı. Bezneñ respublika grajdannarı üzläre berläşep yärdäm cıyarğa täqdim itkän ide. Kön sayın ştablarda 15-20 volontyer kizü tora, keşelär yärdäm kiterüne däwam itä, xäzergä 7 tonnadan artıq yärdäm cıydıq,” – dip söyläde Tatarstan yäş’lär êşläre ministrı urınbasarı Aygöl Sabirova.
Gumanitar yärdäm cıyu 8 noyabr’gä qadär däwam itäçäk, dip östäde ul. İñ kiräkle äyberlär isemlege “Yärdäm yänäşä! Yärdäm yaqında ğına!” xäräkäte saytında urnaştırılğan. Ayırım alğanda, kiräkle äyberlär arasında gigiyena häm mediŝina yärdäme çaraları, balalar häm ölkännär kiyeme, balalar rizıqları bar.
Antaliya şähärendä “Yörük” Xalıqara törki mädäniyätlär festivale uzdı
3 noyabr’ könne Törkiyä Respublikası Antaliya şähärendä “Yörük” Xalıqara törki mädäniyätlär festivale uzdı. Çarada Bötendön’ya tatar kongressı Başqarma komitetınıñ yaqın häm yıraq çit illärdäge tatar ictimağıy oyışmaları belän êşläw bülege citäkçese Lenara Kuteyeva citäkçelegendä Bötendön’ya tatar kongressı delegaŝiyase qatnaştı. Bu xaqta Bötendön’ya tatar kongressı matbuğat ezmäte xäbär itä.
Tatar delegaŝiyase sostavında “Qazan xalıq sänğate hönärläre texnikumı” mödire Rayşaniya Säübanova, “Qazan xalıq sänğate hönärläre texnikumı” möğallimnäre Göliyä Safina, Läysän Xaciyeva, Ruslan Gabitov citäkçelegendäge “Rivayät’” törkeme dä bar ide.
Festival’ qunaqların Antaliya şähäre mêrı Muhittin Böcek sälamläde häm qatnaşuçı delegaŝiyalär yasağan yortlar belän tanıştı. Bötendön’ya tatar kongressı yasağan “Tatar yortı” mäydannıñ näq’ üzägendä urnaşqan. Biredä Muhittin Böcekkä Tatarstan Respublikası prem’yer-ministrı urınbasarı, Bötendön’ya tatar kongressı Milli şurası räise Vasil Şäyxrazıyevnıñ sälamläw xatı tapşırıldı.
“Tatar yortı”nda festival’ qunaqları tatar mädäniyäte belän tanıştı. Biredä şulay uq qalfaq tegü häm kün çigü buyınça master-klasslar ütkärelde.
“İntertat” saytı rekordlar kitabına kertelgän
“İntertat” saytı “tatar telendäge iñ küp uqıla torğan web-sayt” bularaq, “İnterrekord” Xalıqara rekordlar kitabına häm Rusiyä rekordları reyestrına kertelde.
“Rusiyädä tatar telendäge iñ küp uqıla torğan sayt – yılına 1 350 000 unikal’ uquçısı bulğan “İntertat” saytı. Baş möxärrir – Rämis Latıypov”, - dip terkäde “İnterrekord” (INTERRECORD) Xalıqra rekordlar kitabı. “İnterrekord” – Awraziyadäge dön’ya rekordları häm qazanışları terki torğan iñ zur agentlık – Ginnesnıñ rekordlar kitabınıñ berençe xalıqara rus telle al’ternativası. Anıñ ştab-kvartirası Pragada.
“Bu bezneñ redakŝiyaneñ ozaq waqıtlar tırış êş näticäsen terkäw. “İntertat” berençelekne 2018 yılda uq aldı häm xäzergä qadär iñ populyar tatar saytı bulıp qala. Uquçılar sanı da yıldan yıl arta bara. Bezneñ kollektivka, bezneñ uquçılarğa, bezneñ geroylarğa häm “Tatmedia”ğa räxmät. Bez – iñ yaxşılar häm kiläçäktä dä tatar jurnalistikası üseşe öçen êşläwne däwam itäçäkbez!” – dide “İntertat” saytınıñ baş möxärrire Rämis Latıypov.
“İntertat” - berençe tatar telle êlektron gazeta. 2001 yılda terkälep, 2002 yılda êşli başlıy. Oyıştıruçısı – “TATMEDİA” akŝionerlık cämğıyäte.
