Räisineñ töşkän boralağı häm Törkiyäneñ keşesez hawa apparatları

Azärbaycan çigendä İlham Äliyev belän urtaq böyä açılışınnan soñ Täbrizgä taba quzğalğan İran däwlät başlığı İbrahim Räisi utırğan boralaqnıñ kilep töşüe näticäsendä İran ilbaşı häm tışqı êşlär ministrı Xösäyen Ämirabdullahiyan belän bergä yuğarı däräcäle wäkillekneñ barısı da yaqtı dön’yadan kitte. Boralaq töşkännän soñ İrannıñ qotqaru törkemnäre hälakät urının ozaq waqıt bilgeli almadı häm Törkiyädän yärdäm soradılar. Törkiyä bu çaqıruğa bik tiz cawap birep, “Akıncı” isemle keşesez hawa apparatı boralaqnı êzläw êşçänleklärendä qatnaştı. Törkiyäneñ bu adımı zur yañğıraş taptı, millionnarça keşe Anadolu agentlığı häm FlightRadar24 kebek platformalarda Törkiyäneñ keşesez hawa apparatınıñ boralaq kisäklären êzläwen turıdan-turı küzätep bardı. Töşkän boralaqnıñ hälakätme yuğıysä sabotajmı buluı älegä bilgesez.

Azärbaycan prezidentı İlham Äliyev häm İran däwlät başlığı İbrahim Räisi ike il çigendä Qız nığıtması häm Hudaferin böyälären açqan ide. Azärbaycan çigendä Äliyev belän urtaq böyä açılışınnan soñ Täbrizgä qaytu öçen kütärelgän häm İbrahim Räisi utırğan boralaqnıñ yuğaluı ber mizgeldä xalıqara iğtibar üzägenä äylände. İran tarafınnan törle belderülär yasaldı häm Räisi belän bäyle bilgesezlek däwam itte. Näticädä däwlät başlığı Räisi häm tışqı êşlär ministrı Xösäyen Ämirabdullahiyan belän bergä yuğarı däräcäle wäkillek utırğan boralaqnıñ töşüe añlaşıldı.

Törek saqlanu ministrlığı yasağan belderügä kürä İranlılar belän urnaştırılğan êlemtädän soñ töbäkkä şunduq tönlä kürä aluçı sistemaları bulğan boralaq häm “Akıncı” isemle hawa apparatı cibärelde. “Akıncı” da urtaqlaşqan video yazmalardan hawa şartlarınıñ bik naçar, dawıl häm tomannıñ buluın kürep bula. SAT com belän TürkSAT iyärçennäre yärdämendä hawa apparatı Räisineñ töşkän boralaq kisäklären taptı häm koordinatalarnı İran citäkçelegenä citkerde.

İran ilbaşı utırğan boralaq naçar hawa şartları arqasındamı töşte yuğıysä bu sabotajmı? Älegä bilgesez. İrandağı bäyläneşlelär yaxşılap tırışlıq quyaçaq häm çınbarlıqnı açıp salaçaq. Hiçşiksez, sabotaj bulğan bulsa, aqılğa berençe itep İzrail kilä. Ğazzägä qarşı höcümnär başlanğannan soñ İran belän İzrail arasında monnan alda turıdan xärbi bäreleşlär buldı läkin AQŞnıñ qatışuı belän kiyerenkelek üsmäde. Läkin İrannıñ köçle höcümnärenä qarşı İzrail tulısınça cawap qaytara almadı. İzraille räsmi zatlar “waqıtı citkäç İran cawabıbıznı küräçäk” digän belderülär yasadılar. Fäqat’ Räisi utırğan boralaqnıñ kim digändä 30 yıllıq buluı, naçar hawa şartlarında oça alu öçen citärle texnikağa iyä bulmawı da belenä. Töbäktä köçle dawıl häm tomannıñ buluın da isäpkä alsaq, hälakätneñ çığu ixtimalı da yuğarı.

Sabotaj bulsa, texnik tikşerülär näticäsendä açıqlanaçaq. Ämma İran däwläte citärsezlege arqasında tänqıyt’kä totılaçaq. Boralaqnıñ texnik yaqtan yaxşı bulmawı, qotqaru êşçänleklärendäge zäğıyf’lek häm Törkiyädän yärdäm sorarğa mäcbür qaluları moña säbäp bulıp tora.

Mäs’älägä Törkiyä küzlegennän qarasaq, gumanitar yaqtan kürşelek wazifasın başqardı ul. İrannıñ yärdäm taläbe şunduq cirenä citkerelde häm barlıq texnik mömkinleklär mobilizasiyalände. Şulay uq “Akıncı” keşesez hawa apparatı häm TürkSat iyärçennäreneñ uñışı da global’ cähattän iğtibar cälep itep, Törkiyäneñ saqlanu sänägäte ireşkän alğarışnı tağın ber tapqır kürsätte.

Can ACUN

SETA säyäsät, iqtisad häm cämğiyät tikşerenüläre waqıfınıň tışqı säyäsät tikşerenüçese