Törki cömhüriyätlärneñ kön üzägendäge waqıyğalar
Awraziya qaytawazı (кaйтавaзы) - 53/2023
“Türkiyä awazı” radiosında äzerlängän “Awraziya qaytawazı (кaйтавaзы)” tapşıru tezmäseneñ bu çığarılışında Törki cömhüriyätlärneñ kön üzägendäge waqıyğalarğa tuqtalabız.
Ağımdağı yılnıñ 20nçe-22nçe avgust könnärendä Qazaqstan ilbaşı Qasıym-Cumart Toqayıv V’yetnam sośialistik (социалистик) cömhüriyätenä täwge tapqır räsmi säfär yasadı. Xanoyda ul däwlät citäkçese Vo Van Txıong, xökümät räise Fam Min’ Çin’, parlament spikerı Vıong Din’ Xyuê häm Kommunistlar partiyäse räise Nguen Fu Çong belän ayırım-ayırım oçraştı. Söyläşülär näticäsendä ike däwlät arasında 12 kileşü imzalandı. İlbaşı Toqayıv säfär qısalarında V’yetnamnıñ aldınğı êşmäkärläre belän dä küreşte häm citeşterü ob’yektlarına bardı.
22nçe-23nçe avgustta Üzbäkstan ilbaşı Şäwkät Mirziyayıv Azärbaycanğa säfär yasadı. Baqıda anı Azärbaycan däwlät başlığı İlham Äliyıv räsmi tantana belän qarşıladı. Uzdırılğan söyläşülärdän soñ ike il arasında 15 kileşü imzalandı. Monnan tış, Azärbaycan häm Üzbäkstan däwlätlärarası yuğarı şurası tözelde. İlbaşı Mirziyayıv säfär qısalarında Fuzuli häm Şuşa şähärlärenä dä bardı. Liderlar Fuzulida Üzbäkstan tözettergän Mirza Uluğbäy mäktäbeneñ açılışında qatnaştı. İsegezgä töşerep ütik, bıyıl Xivä häm Şuşa tuğandaş şähärlär protokolın imzaladı.
22nçe-24nçe avgust könnärendä Fälästin tışqı êşlär ministrı Riyad äl-Maliki Üzbäkstan häm Törekmänstanğa räsmi säfär yasadı. Ul älege illärdäge wazıyfadaşları belän oçraşular uzdırdı. Tışqı êşlär ministrlıqları arasında kileşü memorandumnarı imzalandı. Fälästinnän kilgän räsmi qunaqnı Törekmänstan ilbaşı Särdar Bärdemöxämmädov, xalıq êşläre idaräse citäkçese Gorbangulı Bärdemöxämmädov häm parlament räise Dön’yagüzäl Gulmanova qabul itte.
24nçe avgustta Kön’yaq Afrikada BRİKS sammitı uzdı. Anıñ qısalarında oyıştırılğan BRİKS+ kiñäşmäsendä Qazaqstan ilbaşı Qasıym-Cumart Toqayıv Şanxay xezmättäşlege oyışması çor räise bularaq onlayn qatnaştı. Rusiyä Federaśiyäse (Федерациясе) däwlät başlığı Vladimir Putin da Xalıqara mäxkämäneñ qulğa alu qararı säbäple sammitqa kilmäde, barı internet aşa qatnaşırğa mäcbür buldı.
24nçe avgustta Qırğızstan ilbaşı Sadır Caparov Awrupa Berlege parlamentı tışqı mönäsäbätlär komissiyäse räise Dêvid Makkalister citäkçelegendäge delegaśiyäne (делегациясене) qabul itte. Oçraşuda Qırğızstan belän Awrupa Berlege mönäsäbätlären qızıqsındıruçı mäs’älälär qaraldı.
25nçe-26nçı avgust könnärendä Tacikstan ilbaşı İmamali Raxman Qazaqstanğa räsmi säfär yasadı. Ul ilbaşı Qasıym-Cumart Toqayıv belän qara-qarşı utırıp söyläşte. Säfär qısalarında 23nçe-26nçı avgustta Astanada Tacikstan mädäniyät könnäre çaraları uzdı.
20nçe avgustta Üzbäkstan ilbaşı Säwkät Mirziyayıv däwlät başlığı strukturasın üzgärtü turındağı qararnı imzaladı. Yaña tözätmälär nigezendä ilbaşı ğomum särqatibe urınına ike urınbasar wazıyfası buldırıldı. 26nçı avgusttağı qarar belän Säidä Mirziyayıva ilbaşı urınbasarı itep bilgelände.
Waqıyğalardan kürengänçä, uzğan atnada Törki cömhüriyätlärneñ liderları ähämiyätle säfärlär yasadı, Azärbaycan-Üzbäkstan mönäsäbätläre yaña däräcägä kütärelde.
Abdrasul İsakov
