Törki cömhüriyätlärneñ kön tärtibendäge waqıyğaları
Awraziya qaytawazı (кaйтавaзы) - 51/2023
2023nçe yılnıñ 8nçe avgust könne Üzbäkstan İlbaşı Şäwkät Mirziyayıv “Cängiz Holding” başlığı Mäxmät Cängiz citäkçelegendäge Törkiyä wäkillegen qabul itte. Taşkent şähärendä ütkärelgän söyläşü waqıtında şuşı xoldingnıñ Üzbäkstandağı investiśiyäläre (инвестицияләре) quzğatıldı. Bilgele bulğança, “Cängiz Holding” Üzbäkstannıñ Taşkent häm Sırdär’ya vilayätlärendä êlektr stanśiyäläreneñ (станцияләренең) tözeleşen tämamladı häm ênergetika tarmağınnan qala taw sänäğäte, transport häm tözeleş ölkälärendä dä êşçänlek alıp bara.
2023nçe yılnıñ 8nçe avgust könne Baqıda Azärbaycannıñ Xalıqara mönäsäbätlär analizı üzäge häm Üzbäkstannıñ Üzäk Aziya xalıqara institutı tarafınnan “Azärbaycan-Üzbäkstan: xezmättäşlekneñ yaña ofıqları” isemle tügäräk östäl cıyılışı uzdı. Cıyılışta Azärbaycan-Üzbäkstan ike yaqlı mönäsäbätläreneñ xäzerge torışı häm kiläçäge tikşerelde. Cıyılış axırında şuşı oyışmalar arasında xezmättäşlek kileşüe memorandumı imzalandı. Qabat Üzbäkstan İlbaşı bulıp saylanğan Şäwkät Mirziyayıvneñ berençe çit il säfären avgust ayında Azärbaycanğa yasawı planlaştırıla.
2023nçe yılnıñ 8nçe avgust könne Baqıda Azärbaycan Milli saqlanu ministrı urınbasarı Kärim Wäliyıv Törkiyä Cömhüriyäteneñ Milli saqlanu ministrlığı ğomum ştab küzläw başlığı İsmail Günaydın citäkçelegendäge wäkillekne qabul itte. Söyläşü waqıtında ike il arasındağı küzläw mäğ’lümate belän urtaqlaşu kebek ölkädä xezmättäşlek mäs’äläläre quzğatıldı.
2023nçe yılnıñ 9nçı avgust könne Rusiyäneñ “TASS” räsmi xäbär agentlığı Rusiyä Federaśiyäseneñ (Федерациясенең) Tön’yaq Kipr Törek Cömhüriyätendä konsullıq xezmäten birä başlayaçağın yazıp çıqtı. Xäbärdä konsullıq xezmäteneñ Tön’yaq Kipr Törek Cömhüriyätendä açıluına säbäp bularaq rusiyälelär sanınıñ ildä artuı kürsätelde. Rusiyäneñ Kipr respublikası (Kön’yaq Kipr) ilçese Murat Zyazikov mäs’älä belän bäyle belderü yasap: "Ozaqqa suzılğan bu qararda säyäsi işarät yuq. Kiprnıñ tön’yağında yäşäwçe Rusiyä ildäşlärebezgä xezmät öçen barı tik humanitar borçılular iğ’tibarğa alınıp başqarılğan ğamäl”, - dip äytte.
2023nçe yılnıñ 11nçe avgust könne Qazaqstan İlbaşı Qasıym Cumart Toqayıv Awrupa iminlek häm xezmättäşlek oyışmasınıñ çirattağı başlığı, Tön’yaq Makedoniya tışqı êşlär ministrı Buyar Osmanine qabul itte. Söyläşü waqıtında Qazaqstannıñ Tön’yaq Makedoniya häm Awrupa iminlek häm xezmättäşlek oyışması belän xezmättäşlek mäs’älälärenä tuqtalıp uzıldı. Qazaqstan İlbaşı Toqayıv Tön’yaq Makedoniya belän mönäsäbätlärneñ bik yaxşı buluın, Öskeptä ilçelek açu qararın qabul itülären belderde. 2023nçe yılnıñ 10nçı avgust könne Buyar Osmani Azärbaycan tışqı êşlär ministrı Cäyhun Bäyrämov belän telefon söyläşüen ütkärgän ide.
Qazaqstan häm Üzbäkstan uzğan atnada Aqtawda (Актауда) urtaq xärbi künegülär ütkärde. “Xäncär-2023” isemle xärbi uyınnarnı ike ilneñ saqlanu ministrları Ruslan Caksıbäkov häm Bahodir Qurbanov bergä qaradı. Törki cömhüriyätlär arasında urtaq häm ike yaqlı xärbi künegülär oyıştıru tradiśion (традицион) bula başladı.
Täräqqıyätlärdän kürengäne kebek, uzğan atnada törki cömhüriyätlär arasında xezmättäşlekne nığıtuçı möhim alğarışlar, waqıyğalar yäşände.
Abdrasul İsakov
