Tatarstan xäbärläre 20/2024

Bötendön’ya êtnosport konfederaśiyäse prezidentı Tatarstan Respublikası Räise belän oçraştı

Tatarstan Respublikası Räise Röstäm Miñnexanov Bötendön’ya êtnosport konfederaśiyäse prezidentı Näcmetdin Bilal Ärdoğan belän oçraştı. Ul êş säfäre belän Tatarstanğa kilde. Oçraşu barışında yaqlar sport ölkäsendä alğa taba xezmättäşlek itü, bulğan êlemtälärne nığıtu häm xalıqara sport yarışlarında qatnaşu turında fiker alıştı .

Röstäm Miñnexanov Tatarstanğa iğ’tibarı öçen Ärdoğanğa räxmät belderde. Ul şulay uq Bilal Ärdoğannıñ, Bötendön’ya êtnosport konfederaśiyäse prezidentı bularaq, törle xalıqlar, şul isäptän törki telle däwlätlär arasında mädäni häm sport êlemtälären üsterü öçen küpne êşläwen bilgeläp ütte.

Näcmetdin Bilal Ärdoğan Qazanğa çaqıru öçen räxmät belderde häm bu säfärendä Böyek Bolğarnı barıp kürergä ömetlänüen äytte. Ul Röstäm Miñnexanovnıñ Tatarstan Respublikası belän Törkiyä arasındağı mönäsäbätlärne üsterügä kertkän öleşen yuğarı bäyäläwen assızıqladı.

”Sez törki xalıqlar, İslam illäre arasındağı mönäsäbätlärneñ nığuın täêmin itüçe qırnı buldırasız. “QazanForum” şundıy berläşterä torğan mäydançıq bularaq xezmät itä”, - dide Bötendön’ya êtnosport konfederaśiyäse prezidentı Näcmetdin Bilal Ärdoğan.

Tatarstanda tuuçılar sanı kimegän

2024 nçe yılnıñ berençe ike ayında Tatarstanda tuuçılar sanınıñ kimüe häm ülüçelärneñ artuı terkälgän.

Ğıynwar häm fevral’ aylarında respublikada 5 meñ 497 balanıñ tuuı terkälgän, bu uzğan yılnıñ şuşı çorı belän çağıştırğanda 138gä kimräk.

Şul uq töbäktä 8 meñ 267 ülem oçrağı terkälgän. Ul 2023nçe yılnıñ ğıynwar häm fevral’ ayı belän çağıştırğanda 912gä kübräk bulğan.

Näticädä tuuçılar sanı 3,4%qa kimegän, ä ülüçelär sanı 10,5%qa artqan.

Tatarstanda söt citeşterü artqan

2024 nçe yılnıñ ğıynwar-mart aylarında Tatarstanda söt citeşterü , uzğan yılğa qarağanda, 5,9%qa artqan. Ämma it öçen terlek häm qoş-qort üsterü 2,7%qa, şulay uq yomırqa citeşterü 0,6%qa kimegän.

Ğomumän alğanda  töbäktä barlıq tör xucalıqlar yılnıñ berençe ike ayında itkä 116 meñ 800 tonna terlek häm qoş, 526 meñ 100 tonna söt häm 361 million 900 meñ danä yomırqa citeştergän.

Qazan federal’ universitetında ädäbiyät ğalime Xatıyp Miñnegulovnıñ yubiley kiçäse bula

16 nçı mayda 14.00 säğat’tä Qazan federal universitetınıñ (KFU) Filologiya häm mädäniyätara bağlanışlar institutınıñ aktlar zalında filologiya fännäre doktorı, Qazan universitetınıñ atqazanğan professorı, Rusiyäneñ häm Tatarstannıñ atqazanğan fän êşleklese, KFUnıñ tatar ädäbiyätı kafedrası ğalime Xatıyp Miñnegulovnñ 85 yäş’lek yubiley kiçäse bula.

Ädäbi – muzıkal’ kiçädä ğalim, fän häm mädäniyät êşlekleläre, cämäğat’çelek, yubilyarnıñ xezmättäşläre, şäkertläre, ministrlıq wäkilläre, yuğarı uqu yortı citäkçeläre häm başqalarnıñ qatnaşuı, çığış yasawı kötelä. Kiçädä ğalimneñ xezmätläre, kitapları täq’dim iteläçäk. Yubiley kiçäsenä kerü irekle.

Törkiyäneñ Märmärä uqu yortında ğalim İl’yas Qamalov tatarlar turında söyläde

İstanbulnıñ Märmärä universitetında millättäşebez, tatar-törek tarix ğalime İl’yas Kamalov İsmäğıyl’ Ğaspralı istälegenä bağışlanğan ictimağıy-mädäni çarada “Dön’ya tarixında tatarlar” digän temağa çığış yasadı.

Professor İl’yas Kamalov tatarlarnıñ yıraq tarixı belän tanıştırdı, Altın Urda däwläte çorı, tatar xanlıqları, bügenge tatar xalqı häm Tatarstan xaqında söyläde, sorawlarğa cawap birde.

Çarada älege uqu yortınıñ “Märmärälelär” muzıka törkeme ”Törki dön’ya cırları: Qırım häm Tatarstan” dip atalğan programma belän çığış yasadı. Säxnädän qırım häm İdel buyı tatarlarınıñ borınğı häm zamança cırları yañğıradı.

Tapşıruda Tatarstan Räiseneñ matbuğat xezmäte, “Tatar-inform” xäbär agentlığı  yazmaları qullanıldı.