Tatarstan xäbärläre 22/2024

Tatarstan häm tatar dönyasındağı qayber waqıyğalarğa qısqaça küzätü

2145095
Tatarstan xäbärläre 22/2024

Tatarstan xäbärläre - 22/2024

Miñnexanov TASSRnıñ 104 yıllığı belän qotladı.

Tatarstan räise Röstäm Miñnexanov xalıqnı TASSR tözelü turındağı dokument imzalanuğa 104 yıl tulu belän täbrik itte. Bu nisbättän ul “Telegram” kanalında qısqa videoyullama çığardı. “1920nçe yılnıñ 27nçe mayında TASSR tözelü turında Dekret imzalandı. Tuğan köneñ belän, respublikam” diyelä anda.  

Tarixqa küz salsaq, 1920nçe yılnıñ 26nçı ğıynvarında bol’şeviklar Tatarstan respublikası tözelü turında qarar qabul itä. 4nçe mayda Vladimir Lenin räislegendä uzğan RSFSR xalıq komissarları utırışında Tatarstan Avtonomiyäle Sovet Sośialistik Respublikası tözelü mäs’äläse buyınça materiallar äzerläw öçen komissiyä oyıştırıla. Aña İosif Stalin, Säxipgäräy Säyetğaliyev häm Mirsäyet Soltan-Ğaliyev kerä. 27nçe mayda imzalanğan dokument yaña däwlätneñ statusın, territoriyäsen, citäkçelek organnarın häm üzäk idarä belän mönäsäbätlären bilgeli.   

Tatarstan räise Üzbäkstanğa êşlekle säfär yasıy

Tatarstan räise Röstäm Miñnexanov êşlekler säfär belän Üzbäkstanğa yul tottı. Biredä ul yuğarı däräcäle räsmi zatlar belän oçraştı häm maxsus cıyılışlarda qatnaştı. Taşkentta uzğan söyläşülärdä ike aradağı bäyläneşlär küzdän kiçerelde. Uzğan yılğı yomğaqlarğa qarağanda, Tatarstan-Üzbäkstan tovar äyläneşe 27%qa artıp 370 million dollar täşkil itkän.   

Êngel’ Fättäxov - saq astında, Rail Sadriyevqa çikläw çarası bilgelänä

Tatarstannıñ Minzälä rayonı mäxkämäse êlekkege mäğarif häm fän ministrı, Aqtanış rayonınıñ êlekkege başlığı Êngel’ Fättäxovqa qarata çikläw çarası bilgeläde. Anı rayon başlığı bulıp êşlägän çorda tözeleş şirkätennän rişwät aluda ğayeplilär. Fättäxovnı 2 ayğa saq astına aldılar.

Ä Bua däwlät drama teatrı direktorı Rail Sadriyevqa qarata Qazannıñ Vaxitov rayonı mäxkämäse qarar çığardı. Anı wazifai wäqalätlären arttıruda ğayeplilär. Tikşerü versiyäse buyınça, 2023nçe yılnıñ martınnan may ayına qadär Sadriyev  “Därwiş” spektaklen quyuçı itep üzeneñ xatının kürsätä. Çınlıqta isä ul bu êşne başqaruçı bulmıy. Zıyan 450 meñ sum täşkil itä.

Rail Sadriyevqa 2nçe iyül’gä qadär tıyuçı çaralar bilgelänä. Aña tönlä yäşäw urının qaldırıp kitü, teatr xezmätkärläre belän aralaşu, teatr binasına kerü, xat cibärü häm alu, şulay uq, internettan faydalanu tıyıla. Yuqsa ul üzenä buysınuçı xezmätkärlärgä basım yasarğa, dälillärne yuq itärgä yäki tikşerüdän qaçıp qotılırğa mataşırğa mömkin, dip sanıy tikşerüçe.

Älege xäldän soñ 16 teatr kollektivı Rail Sadriyevnı yaqlap Tatarstan tikşerü idaräse citäkçese Valeriy Lipskiyğa açıq xat yazğan. Anı Rusiyä teatr ähelläre berlegeneñ Tatarstan bülege räise Färit Bikçäntäyev imzalağan.

Sara Sadıyqovanıñ babası salğan yortqa - istälek taqtası

Tatar meśenatı Sara Sadıyqovanıñ näsel yortı bulğan Äxmätşa babay yortına memorial’ taqta quyarğa teli. Älege yañalıqnı Tatarstan mädäniyat ministrlığı belgeçe, tarixçı ğalim Ayrat Fäyzraxmanov urtaqlaşa. Ul “Şärıq’ klubı”nda oyıştırılğan tuğan könendä monı kompozitornıñ varisı Älfiyä Aydarskayağa citkerde. Aña 99 yäş’ tuldı. “Sezneñ xatiräläregez tarixçılar öçen qızıqlı çığanaq bulıp tora. Qazannıñ Bişbalta bistäsendä sezneñ näsel yortığız bulğan Äxmätşa babay yortı isän. Ber meśenatıbız şuşı yortqa memorial’ taqta quyarğa teli”,-dide Ayrat Fäyzraxmanov. Süz tatar meśenatı Ğaräfetdin Xisametdinov turında. Äxmätşa babay tözetkän 2 qatlı nıqlı büränädän salınğan yort Mädäni miras ob’yektı tügel häm anda istälek taqtası yuq. 

 Qazanda “Näwrüz” forumı başlandı

Qazanda teatral’ belem birüçe “Näwrüz” forumı 27nçe mayda başlandı. Qamal teatrı iniśiativası belän oyıştırılğan çara 1 atna däwamında 12 sekśiyädä êşliyäçäk. Anda Mäskäwdän, Sankt-Peterburgtan häm başqa şähärlärdän 41 pedagog belem birä. Uqu öçen 200dän artıq keşe terkälgän. Çara 1nçe iyün’gä qadär bara.

Tapşırunı äzerlägändä “İntertat” êlektron gazetı, “Tatar-inform” mäğ’lümat agentlığı. Tatarstan räiseneñ räsmi portalı häm başqa räsmi çığanaqlardan faydalanıldı.



Bäyläneşle xäbärlär