اظهارات تند سفیر افغانستان در مسکو، سبب خشم تاجیکستان شد

 وزارت امور خارجه تاجیکستان به طور رسمی به سخنان «عبدالقیوم کوچی» سفیر افغانستان در روسیه اعتراض کرد.

به گزارش اسپوتنیک، سفیر افغانستان در دوشنبه به وزارت خارجه دعوت و یادداشت اعتراض شدید طرف تاجیکستان در ارتباط با اظهارات تحقیرآمیز سفیر افغانستان در روسیه نسبت مردم و دولت این کشور، تحویل شد.

قبلآ عبدالقیوم کوچی سفیر افغانستان در روسیه و یکی از بستگان نزدیک اشرف غنی اعلام کرد که در تاجیکستان گروه‌های قوی مافیایی وجود دارند و به قاچاق مواد مخدر افغانستان مشغول هستند.

عبدالقیوم کوچی  در مصاحبه با شفیع عیار که در این روز ها در یوتوب ظاهر شد، روسیه را به قاچاق مواد مخدر متهم کرد و گفت"من در ملاقات بایکی از مقامات بلند پایه روسیه برایش گفتم، مواد مخدر در افغانستان کشت می‌شود، ولی پشت سر آن شما (روس ها) و مافیای تاجیکستان است".

سفیر افغانستان گفت:" تاجیکستان یک کشور کوچک با جمعیت کمتر از 5 ملیون نفر است که یک میلیون آنها را روسها تشکیل میدهد. تاجیک ها حق نوشتن به زبان خود را ندارند، آنها حتی نوشتار خود را تغیر داده اند. در تاجیکستان گروه‌های قوی مافیای فعالیت دارند".

دولت تاجیکستان به صورت قاطع به دولت افغانستان هشدار داده سخنان یکی از مقامات رسمی این کشور را مورد بازبینی قرار داده و تدابیر موثری در این زمینه به کار گیرند.