په سوریه کې یو تن بل ایراني عسکري چارواکی ووژل شو

په سوریه کې  د ایران د انقلاب ساتونکو ځواکونو یو تن بل  جګپوړی چارواکی ووژل شو.

د ایران د انقلاب ساتونکو ځواکونو  ډګروال  حاجي علي منصوري  تیره ورځ  په سوریه کې په نښته کې ووژل شو.

د ایران د خبري رسنیو د خبر له مخې  نوموړی  د داعش ترهګرې ډلې لخوا وژل شوی دی . ویل کیږي  نوموړی  ایراني  ډګروال  د ۱۹۸۰ او ۱۹۸۸ کلونو ترمنځه د ایران او عراق په جګړه کې  ټپي شوی وو. نوموړی  د ایران عراق د جګړې  د غازیانو نه  وو چې  تیره ورځ په سوریه کې  ووژل شو.

د یادولو وړ ده چې  ایران  د سوریې په جګړه کې د جګپوړو جنرالانو په ګډون  یو زیات شمیر  سرتیري  د لاسه ورکړي دي.

د ایران د انقلاب ساتونکو ځواکونه  په سوریه کې  د بشار اسد په پلوي  د مخالفینو پر خلاف  جګړه کوي. سره ددې چې  ایران پدې جګړه کې په مستقیم  ډول  د ایراني ځواکونو ګډون  ردوي   وخت نا وخته  د جګړې په ډګر کې د ایراني سرتیرو او جګپوړو  عسکري چارواکیو د وژل کیدو  خبرونه  خپریږي.