Жапония мен Австралия арасында қорғаныс келісімі

Жапония мен Австралия бірлескен әскери жаттығулар өткізуге мүмкіндік беретін өзара қол жеткізу туралы келісімге (RAA) қол қойды.

Тынық мұхиты аймағындағы екі аралдық мемлекет Қытайдың аймақтық әскери әрекеттерінің күшеюі жағдайында қорғаныс саласындағы ынтымақтастықты нығайту жолдарын іздестіруде.

Жапония премьер-министрі Кишида Фумио мен Австралия премьер-министрі Скотт Моррисон екіжақты және аймақтық оқиғаларды талқылады.

«Еркін және ашық Үнді-Тынық мұхиты» көзқарасын жүзеге асырудың маңыздылығын атап өтіп, қос тарап қауіпсіздік саласындағы ынтымақтастықты нығайтуға уәде берді.

Баспасөзге ашық бөлімде келісімнің маңыздылығына тоқталған Кишида: «Бұл - Жапония мен Австралия қауіпсіздік саласындағы ынтымақтастықты жаңа деңгейге көтеретін символдық келісім» деді.

Моррисон болса «тарихи» деп сипаттаған келісімнің екі ел арасындағы ынтымақтастықты жоғары деңгейге көтеруге мүмкіндік беретінін айтты.

Екі ел басшылары екі елдің армиялары арасындағы өзара әрекеттестік пен ынтымақтастықты арттыратын «Өзара қол жеткізу» келісіміне қол қойды.

Келісім қорғаныс қызметкерлерін бірлескен оқу-жаттығулар мен апаттарды жоюға, сондай-ақ қару-жарақ пен техниканы жөнелтуді жеделдету және жеңілдетуге бағытталған.

Токио мен Канберра үкіметтері бұл келісім бойынша 2014 жылы ауқымды келіссөздерді бастап, 2020 жылдың қарашасында келісімге қол жеткізді.