სამხრეთ კორეა: ჩრდილოეთ კორეა-რუსეთის სამხედრო თანამშრომლობა უკანონო და უსამართლოა

სამხრეთ კორეა: ჩრდილოეთ კორეა-რუსეთის სამხედრო თანამშრომლობა უკანონო და უსამართლოა

სამხრეთ კორეის პრეზიდენტმა იუნ სოკ იოლმა განაცხადა, რომ ჩრდილოეთ კორეასა და რუსეთს შორის სამხედრო თანამშრომლობა „არალეგალური და უსამართლოა“ და რომ საერთაშორისო საზოგადოება უფრო მჭიდროდ გაერთიანდება მის წინააღმდეგ.

Associated Press-თან საუბრისას იუნმა შეაფასა ჩრდილოეთ კორეა-რუსეთის თანამშრომლობა და გაეროს 78-ე გენერალური ასამბლეის მოლაპარაკებები, რომელიც აშშ-ში, ნიუ-იორკში გაიმართება.

მან განაცხადა, რომ ჩრდილოეთ კორეა-რუსეთის სამხედრო თანამშრომლობა "არალეგალური და უსამართლოა", რადგან ის ეწინააღმდეგება გაეროს უშიშროების საბჭოს რეზოლუციებს და სხვა საერთაშორისო სანქციებს და დაამატა: "საერთაშორისო საზოგადოება უფრო მჭიდროდ გაერთიანდება ასეთი ნაბიჯის წინააღმდეგ".

იუნმა თქვა, რომ თუ ფხენიანი შეეცდება გამოიყენოს რაიმე ბირთვული იარაღი, შეერთებული შტატები და სამხრეთ კორეა „გადადგამენ სწრაფ, გამანადგურებელ და გადამწყვეტ პასუხს, რომელიც დაასრულებს რეჟიმს“.

მანვე განაცხადა, რომ ვაშინგტონი და სეული გაზრდის შეკავებისა და რეაგირების შესაძლებლობებს ჩრდილოეთ კორეის ბირთვული ან სარაკეტო საფრთხის წინააღმდეგ და რომ ორ ქვეყანას შორის "გაფართოებული შეკავება" გადაიქცევა საერთო სისტემად.

იუნმა ასევე განაცხადა, რომ სამხრეთ კორეას, ამერიკის შეერთებულ შტატებსა და იაპონიას შორის უსაფრთხოების თანამშრომლობა არ დააზარალებს ურთიერთობებს ჩინეთთან და დასძინა: „არ აპირებს რომელიმე ქვეყნის მარგინალიზაციას ან სპეციალური კოალიციის შექმნას“.

ჩინეთის პრეზიდენტ სი ძინპინთან და პრემიერ-მინისტრ ლი ციანთან შეხვედრებზე საუბრისას იუნმა განაცხადა, რომ „ჩინეთი ასევე ანიჭებს მნიშვნელობას სამხრეთ კორეასთან ურთიერთობას“.

იუნმა აღნიშნა, რომ სამხრეთ კორეას, ამერიკის შეერთებულ შტატებსა და იაპონიას აქვთ საერთო მოსაზრება იმის შესახებ, თუ რამდენად მნიშვნელოვანია ჩინეთის კონსტრუქციული როლი კორეის ნახევარკუნძულზე და რეგიონში არსებული პრობლემების, ასევე გლობალური გამოწვევების მოგვარებაში.

მეორეს მხრივ, იუნმა განაცხადა, რომ გაეროში სიტყვით გამოსვლისას გაამახვილებს ყურადღებას განვითარების, კლიმატისა და ციფრული ტრანსფორმაციის სფეროებზე და ასევე იტყვის, რომ ისეთ საკითხებში, როგორიცაა ომი უკრაინაში და ჩრდილოეთ კორეის ბირთვული პროგრამა, რომელიც მოითხოვს საერთაშორისო სოლიდარობას, სამხრეთ კორეა პასუხისმგებელ როლს შეასრულებს უსაფრთხოების საკითხებში.

იუნმა აღნიშნა, რომ ნიუ-იორკში ვიზიტისას ორმხრივ შეხვედრებს გამართავს 30-მდე ქვეყნის ლიდერთან.