ავღანეთში ცუდი კლიმატური პირობების გამო გაყინული ადამიანების რიცხვი 157-მდე გაიზარდა

ავღანეთში ბოლო ორი კვირის განმავლობაში ცუდი კლიმატური პირობების გამო გაყინული ადამიანების რიცხვი 157-მდე გაიზარდა.

ჰაერის ტემპერატურა ქვეყანაში ღამით დედაქალაქ ქაბულში მინუს 10 გრადუსამდე, ზოგიერთ რაიონში კი მინუს 30 გრადუსამდე დაეცა.

თალიბანის დროებითი მთავრობის ბუნებრივი კატასტროფების სამინისტროს პრესსპიკერმა შაფიულა რაჰიმიმ განაცხადა, რომ 157 ადამიანი დაიღუპა ყინვის შედეგად მთელი ქვეყნის მასშტაბით და დასძინა, რომ ყველაზე მეტი მსხვერპლი გორის, ბადახშანის, პაქტიკასა და პაქტიას პროვინციებშია.

რაჰიმის თქმით, ცუდი კლიმატური პირობების გამო 75000-ზე მეტი პირუტყვი განადგურდა.

ავღანეთის მეტეოროლოგიურმა სამსახურმა აღნიშნა, რომ ჰაერის ტემპერატურა ამ ზამთარში გასულ წელთან შედარებით ორჯერ დაბალია, ხოლო ყველაზე ძლიერი სიცივე გორის პროვინციაში დაფიქსირდა.