Ərdoğan İsrailin fələstinlilərə qarşı törətdiyi qırğınlara münasibət bildirib

"Qəzzalı qardaşlarımız 7 oktyabrdan bəri bəşər tarixinin ən xain hücumlarına məruz qalıblar”. 

Bunu Prezident Rəcəb Tayyib Ərdoğan sədri olduğu Ədalət və İnkişaf Partiyasının (AKP) Türkiye Böyük Millət Məclisində (TBMM) qrup toplantısında etdiyi çıxışda deyib.

Qəzzalıların 7 oktyabrdan bəri bəşəriyyət tarixinin ən xain və iyrənc hücumlarına məruz qaldığını vurğulayan Ərdoğan deyib:

“(İsrail qüvvələri) 50 gün ərzində bütün dünyanın gözü qarşısında Qəzzanı yandırıb dağıdıb. Onlar bəşər tarixində qara ləkə buraxan hər cür vəhşiliklər törətdilər. 70 faizdən çoxu qadın və uşaq olan təxminən 16 min qəzzalı bacı-qardaşımız İsrailin hücumları nəticəsində şəhid oldu. 35 mindən çox fələstinli qardaşımız yaralanıb".

Ərdoğan Qəzzada ötən əsrin ən böyük vəhşiliklərindən birini törədən İsrailin Baş naziri Benyamin Netanyahunun artıq adını tarixə “Qəzza qəssabı” kimi yazdığını bildirib:

“Bu qara ləkə təkcə Netanyahunun alnına deyil, həm də onu qeyd-şərtsiz dəstəkləyən hər kəsindir. Bu rüsvayçılıq ləkəsi heç vaxt təmizlənməyəcək”.

Qəzzada törədilən insanlıq və müharibə cinayətlərinə bir-ikisini çıxmaqla Qərb dövlətlərinin etinasızlığını heç vaxt unutmayacaqlarını vurğulayan prezident deyib:

"İsrail administrasiyasının beynəlxalq hüquq, eləcə də insan vicdanı qarşısında cavabdeh olması üçün bütün mümkün yollara müraciət edəcəyik".