Xarici sürücülük vəsiqəsinin Türkiyədə istifadə müddəti uzadıldı

  Türkiyə vətəndaşlarının digər ölkələrdən aldıqları sürücülük vəsiqəsinin Türkiyədə istifadə müddəti 1 ildən 2 ilə çıxarıldı.

  "Quru yolları idarəçiliyində dəyişiklik edilməsinə dair qərar" “Rəsmi Gazete”də çap olunub.

  Məlumata görə, Türkiyə vətəndaşları xarici ölkələrdən aldıqları sürücülük vəsiqələrini Türkiyəyə daxil olduqları tarixdən etibarən 2 il müddətinə istifadə edə biləcək. Ölkədə 6 aydan çox olanlar maşın sürmək üçün sürücülük vəsiqələrini xarici nümayəndəlik və ya notarius tərəfindən təsdiqlədib Türkiyə türkcəsinə tərcümə edərək hər iki sənədi yanlarında saxlamalıdır.

  Xaricdən alınan sürücülük sənədinin 2 illik istifadəsi sona yetərsə, Türkiyənin əlaqədar idarələri tərəfindən verilən vəsiqələrlə dəyişdirilməsi – yenilənməsi məcburidir.

  Sürücülük vəsiqəsini yeniləmək üçün müraciətlər Türkiyənin hər hansı rayon qeydiyyat şöbəsinə edilməlidir.

  Müraciət əsnasında tələb edilən məlumat və sənədlər Əhali və Vətəndaşlıq İşləri üzrə Departamenti tərəfindən təyin olunur.