"Zeytun Budağı" əməliyyatı Türkiyə ilə yanaşı Avropanın da təhlükəsizliyini təmin edir

 Türkiyənin Avropa İttifaqı İşləri üzrə naziri Ömər Çelik Bolqarıstanın paytaxtı Sofiyada keçirilən Avropa İttifaqı Qeyri-Rəsmi Xarici İşlər Nazirləri Toplantısında iştirak etdi.

Çelik toplantıdan sonra mətbuata açıqlamalar verərək toplantıda "Zeytun Budağı" əməliyyatına dair ətraflı məlumat verdiyini bildirdi, əməliyyatın qeyd-şərtsiz beynəlxalq hüquqa uyğun olduğunu qeyd etdi.
 
 Ömər Çelik Türkiyənin ətrafında  terror dəhlizi yaradılmağa çalışıldığını və buna reaksiyanın çox təbii olduğunu ifadə etdi.
 
Türkiyə naziri  separatçı terror təşkilatı PKK-nın PYD/YPG adı altında Suriyada aktiv şəkildə fəaliyyət göstərdiyinin Qərb ölkələrinin kəşfiyyat hesabatlarında da əks olunduğunu, PKK-ya qarşı aparılan əməliyyatın kürdlərə qarşı olduğunu göstərmə cəhdlərini xatırlatdı,  Türkiyənin Suriyadakı kürdlərin də dostu olduğunu vurğuladı.
 
 Çelik əməliyyatın DEAŞ-la mübarizəni zəiflədəcəyi istiqamətindəki şərhlərlə əlaqədar bunları söylədi: "Bunun tam əksinə olduğu aydındır. Rakkada olduğu kimi, Afrində də PKK-nın PYD və YPG ilə yaxın əlaqədə olduğu dəqiqdir. Bizim o bölgənin təhlükəsizliyini təmin etməyimizlə  DEAŞ terrorçularının Türkiyə və Avropaya keçidinin qarşısı alınacaq. Beləliklə, PYD ilə aparılan mübarizə DEAŞ-la aparılan mübarizəyə də töhfə verəcək. Müttəfiqlərimizdən, Aİ ölkələrindən , "Zeytun Budağı" əməliyyatına tam dəstək vermələrini gözləyirik".