Ermənistan böyük təzminata hazır olmalıdır
Dr. Telman Nüsrətoğlunun mövzuya dair dəyərləndirməsini təqdim edirik.
Azərbaycan, Rusiya və Ermənistan dövlətləri arasında imzalanan üçtərəfli saziş çərçivəsində daha bir tarixi gün geridə qaldı. 01.12 2020 tarixində Azərbaycan Ordusunun bölmələri Laçın rayonunun ərazisinə daxil oldu. Laçının da işğaldan azad edilməsiylə Azərbaycan Türklərinin Qarabağ uğrundakı milli mübarizəsinin əhəmmiyətli bir mərhələsi tam qələbəylə yekunlaşmış sayılır. Türkiyənin Müdafiyə naziri cənab Hulusi Akarın da müharibənin yekunlarıyla bağlı Azərbaycan Müdafiyə Nazirliyində keçirilən toplantıda ifadə etdiyi kimi 44 gün davam edən bu müharibə nəticələri etibariylə 44 il bundan sonra da dünyada və regionda müzakirə edilməyə davam ediləcəkdir. Ağır hərbi məğlubiyyət və üstəlik də pandemiyanın yaratdığı iqtisadi-siyasi tənəzzül nəticəsində hakimiyyət və dövlət böhranının məngənəsində sıxılan Ermənistanın bundan sonra beynəlxalq məhkəmələr vasitəsiylə böyük təzminatlar ödəməsi də gündəmdə olacaq. Bu məsələnin təfərruatlarına girmədən əvvəl Azərbaycan ordusunu tarixi qələbəyə götürən yol, bu qələbəni təmin edən əsas faktorlar haqqında ümumiləşdirilmiş dəyərləndirmə aparmaqda fayda vardır.
Amerikadakı seçkilərdən Rusiya ətrafında formalaşan beynəlxalq təcrid vəziyyətinə, Moskvanın Ankarayla olan əməkdaşlığa artan ehtiyacından İranın məhdudlaşdırılan geopolitik təsir imkanlarına qədər xarici faktorlar baxımından da zamanlaması etibariylə mükəmməl seçilən, dərin siyasi–strateji hesablama və mükəmməl hərbi planlama sayəsində başlayan Qarabağın işğaldan azad edilməsi əməliyyatının qısa müddətdə Azərbaycanın mütləq qələbəsiylə nəticələnməsini təmin edən əsas faktorları aşağıdakı kimi təsnif etmək mümkündür.
Əvvəlcə xüsusi olaraq vurğulamaq lazımdır ki, bütün tarixi–siyasi faktorlar, yorulmadan aparılan işlər işğal altındakı Qarabağ və ətraf rayonların əzəli və əbədi Azərbaycan torpağı olduğu həqiqətini beynəlxalq dairələr nəzdində də ortaya qoymuşdu. Bütün beynəlxalq hüququ aktlar da bunu sübut edirdi. Xalq böyük səbirsizliklə Böyük Vətən Müharibəsinin başlamasını, Qarabağ üçün səfərbər olacağı günü gözləyirdi. Vətənin parçasının işğalına son qoyulması, illərdir torpaqlarından didərgin düşən məcburi köçkünlərin öz yurd-yuvalarına qovuşması fərqli siyasi baxışlara sahib olsalar da iqtidarlı müxalifətli bütün Azərbaycan vətəndaşlarını birləşdirən milli bir məsələ olmuşdu. Prezident İ. Əliyev liderliyindəki siyasi rəhbərlik Ermənistanın sülh yoluyla torpaqları boşaltmayacağını görərək, uzun hazırlıq dövründən sonra qətiyyətli şəkildə qərar alaraq torpaqları işğaldan qurtarmanın zamanı gəldi deyincə uşaqdan böyüyə bütün ölkə dövlətin, Ali Baş Komandanın ətrafında tək yumruq kimi səfərbər olmuş, böyük fədakarlıqla hər kəs cəbhədəki qələbə üçün əlindən gələni etməyə çalışmışdır. Böyük ruh yüksəkliyi, vətənpərvərlik və milli kimlik şüurunun yüksəlməsində heç şübhəsiz Türkiyə- Azərbaycan qardaşlığının gəldiyi nöqtə, son illər Türk televizyaları vasititəsiylə yapılan dizi və proqramlarda aşılanan dəyərlər də rol oynamışdır. Erməni yayılmaçılığı və terror fəaliyətlərinin bu coğrafiyalardakı tarixi inkişaf prosesi göstərmişdir ki, Rusiya başda olmaqla bəzi imperyal mərkəzlərin dəstək və himayəsi olmasaydı tarixi Türk torpaqları olan Rəvən Xanlığı, Zəngəzur və Göyçə mahallarının əsil sahibləri olan Müsəlman Türklər oralardan köç etdirilərək Erməni dövləti qurula bilməzdi. Demoqrafiq, potesniyal hərbi və iqtisadi güc faktorları baxımından çox-çox geridə olan Ermənilərin Azərbaycan Türklərini məğlub edərək yurdlarından çıxarmaları mümkün ola bilməzdi. 90-cı illərdən fərqli olaraq artıq ordusu, kəşfiyyatı, iqtisadiyatıyla Cənubi Qafqazın güc mərkəzi halına gələn bir Azərbaycan reallığı olsa da 2016- cı Aprel ayındakı bir neçə günlük əks-hücum yenə Ermənilərin Kreml rəhbərliyinə yalvarmalarıyla dayandırılmışdı. Yəni şimaldan, cənubdan vəya Qərbdən gələcək hər hansı xarici müdaxilə ehtimalının önlənməsi faktoru qələbəni təmin edəcək strateji məqamların başında gəlirdi. Bu mənada hərbi potensiyalı, geniş coğrafiyalardakı artan təsiriylə gündən-günə güclənən Türkiyə amili, dost və qardaş coğrafiyaların haqqını qorumağı da öz siyasətinin mərkəzinə oturdaraq dünya beşdən böyükdür deyə hayqıran cənab Ərdoğanın qətiyyətli bir üslubla Azərbaycan nə şəkildə istərsə biz o şəkildə yanında olacağıq bəyanı, Türk “F-16” larının ortaq təlimdən sonrası Anadoluya geri dönməyərək hər hansı aqressiyaya qarşı Azərbaycanın keşiyində durması, TBMM başkanı M. Şəntopun Moskvada xarici işlər nazirlərinin kritik üçlü danışıqları davam edərkən “xarici müdaxilə olarsa Qarabağa ordu göndərməkdən çəkinməyəcəyik” bəyanı Ermənistanla Azərbaycanın xarici müdaxilə olmadan baş-başa qalaraq hesablaşması imkanının yaradılması baxımından mühüm idi. Bu amil mərkəzdə olmaqla yuxarıda da vurğuladığımız kimi Rusiyanın da yeni geopolitik tənlikdə Azərbaycan və Türkiyəyə artan ehtiyacı, Çinin İpəkyolu strategiyası çərçivəsində Cənubi Qafqazın ticarət yolları və dəhlizlərinin daha da önəmli hala gəlməsi regional əməkdaşlıq ehtiyacını artırmış, Qarabağın Azərbaycana qaytarılmasını zəruri etmişdir. Ancaq Putinin də ifadə etdiyi kimi Rusiyanın regiondakı güc balansını qorumaq adına savaş boyunca Ermənistanı zəruri silah və texnikayla təmin etməsini, Xankəndinin qapılarına dirənən Azərbaycan ordusu qarşısında regiondakı mövcudiyyətini də qorumaq üçün Erməni silahlılarını tamamən yox olmaqdan xilas etdiyini də unutmamaq lazımdır. Müharibəni qələbəylə nəticələndirən daha bir mühüm hərbi faktor isə, Azərbaycan Ordusunun xüsusi təyinatlılardan ibarət mobil vurucu qüvvələrinin şücaəti (Şuşa əməliyyatı bu mənada da tarixə düşmüşdür), SPUA, PUA kimi sahib olduğu müasir hərbi silah və texnika idi. Bir cümləylə ifadə etsək, milli gücün bütün amilləriylə Azərbaycan Ermənistandan qat-qat güclü olması, hazırlıqlı olduğu üçün qısa müddət ərzində qələbənin təmin edilməsi baş verdi.
Laçının işğaldan azad edilməsiylə bağlı prezident İ.Əliyevin etdiyi son yekun dəyərləndirmə çıxışında qələbənin əhəmmiyətinə, regionda getdikcə güclənən Azərbaycan amilinə diqqət çəkməklə birlikdə bütün mənalarda dalana dirənən, regional layihələrdən təcrid olunmuş Ermənistana verdiyi məsajlarla da yadda qaldı. Prezident boru xətlərindən ticarət yollarına bütün böyük proyektlərdən özünü məhrum edən Ermənistanın Türkiyə, Azərbaycan, İran və Rusiyayla birlikdə Naxçıvanı Türkiyə və Azərbaycanın digər bölgələri, Orta Asiyayla birləşdirən böyük ticarət yolu proyektinə daxil olmasını, Cənubi Qafqazda sülh və əməkdaşlıqdan yana bir siyasət izləməsini bu dalandan çıxmaq üçün son şansı olaraq gördüyünü ifadə etmişdir. Kilsə və ziyalıların on illiklər boyu bütün Erməni cəmiyyətini yoluxdurulduğu reallıqlar və milli imkanlarla üst-üstə düşməyən təcavüzkar, qarşıdurma anlayışı ilə bəslənən Türk düşmanlığı Ermənistan üçün ağır nəticələr doğurmuşdur.
Azərbaycan hökümətinin beynəlxalq qurumları da işin içinə çəkərək viran edilən işğal altında olmuş rayonlara dəyən ziyanı hesablamaq üçün komisiyya formalaşdırması Ermənistanın beynəlxalq məhkəmələrdə böyük miqdarlarda təzminat ödəmək məcburiyyətində qalacağından da xəbər verir. 27 il işğal altında olmuş Yuxarı Qarabağın şəhər və rayonlarında vətəndaşların ev və iş yerləriylə birlikdə yüzlərlə məktəb, kitabxana, tarixi əşya və abidələrdən ibarət olan muzeylər, mədəniyyət evləri, inzabat-idari binalar, məzarlıqlar tamamən talan edilmiş, yer üzündən silinmişdir. 27 il o bərəkətli torpaqların imkanlarından da işğalçı ölkə yararlanmış, Azərbaycan iqtisadiyyatına bu mənada da ciddi ziyan dəymişdir. Kəlbəcərin qızıl yataqlarıyla zəngin olan ərazilərindən bu işğal illəri boyu daşınıb aparılan tonlarla qızıl haqqında daha əvvəlki yazılarımda yazmışdıq. Üçlü saziş çərçivəsində azad edilən Ağdam, Kəlbəcər və Laçından çıxan Ermənilərin oradakı Müsəlman Türklərə aid evləri necə vandallıqla yandırdıqlarına da beynəlxalq media qurumları vasitəsiylə bütün dünya şahid oldu. Xüsusiylə Kəlbəcərdə baş verənlər qədim millət iddiasında olan Ermənilərin xislətinin nədən ibarət olduğunun aşkara çıxması baxımından mühüm idi. Gəncə, Mingəçevir və Bərdə kimi döyüş getdiyi bölgələrin kənarında yerləşən şəhərlərdə mülkü əhaliyə qarsı Rusiyanın verdiyi “İsgəndər” raket kompleksindən istifadə etdiklərinə dair keçmiş Baş Qərargah rəisi Movses Akopyanın etirafı isə insanlıq əleyhinə kütləvi qırğın silahlarından istifadəyə görə də beynəlxalq məhkəmələr qarsısında cavab verməli olacaqlarını ortaya qoymusdur.
Әlaqәli Xәbәrlәr
Kainatda nizam da var, xaos da, çünki … (mətin və audio)
İnsanlar kainat haqqında ən qədim dövrlərdən bəri düşünürlər ...