Türkmənistan İran üzərindən İraqa təbii qaz ixrac edəcək

Türkmənistan ikitərəfli valyuta mübadiləsi razılaşması ilə İran üzərindən İraqa ildə təxminən 10 milyard kubmetr təbii qaz ixrac etməyi planlaşdırır.

Türkmənistanın "Altın Asır" televiziya kanalının xəbərinə görə, Türkmənqaz Dövlət Korporasiyasının prezidenti Maksat Babayev və onu müşayiət edən nümayəndə heyəti İraqın paytaxtı Bağdadda bu ölkənin elektrik naziri Ziyad Əli Fadel ilə görüşüb.

Görüş zamanı iki ölkə arasında enerji sahəsində əməkdaşlıq məsələsi müzakirə edilib və Türkmənqaz Dövlət Korporasiyası ilə İraqın Elektrik Nazirliyi arasında qaz sahəsində əməkdaşlığa dair anlaşma memorandumu imzalanıb.

Razılaşma çərçivəsində hər il təxminən 10 milyard kubmetr Türkmənistan təbii qazının İran üzərindən svop üsulu ilə İraqa göndərilməsi planlaşdırılır və nəqli üçün İran Milli Qaz Şirkəti ilə danışıqlar aparılır.