Azərbaycan Türkiyəyə təbii qaz ixracını 36% artırıb

Bu ilin yanvar ayında Azərbaycandan Türkiyəyə 808 mln. kub metr təbii qaz ixrac edilib.

Bu barədə ölkəmizin Enerji Bazarını Tənzimləmə Qurumunun məlumatında bildirilib.

2018-ci ilin yanvar ayının göstəricisi ilə müqayisədə Azərbaycandan Türkiyəyə ixrac edilən təbii qazın həcmi 36% çoxdur. Azərbaycandan nəql olunan qaz Türkiyənin hesabat ayında ümumi qaz idxalının 13,91%-ni təşkil edib.

Bu ilin ilk ayında Türkiyənin təbii qaz idxalı ötən ilin eyni ayının göstəricisi ilə müqayisədə 6,54% azalaraq 5 mlrd. 810 mln. kub metr təşkil edib.

Türkiyənin idxal etdiyi təbii qazın 3 mlrd. 470 mln. kub metri boru kəmərləri, 2 mlrd. 340 mln. kub metri isə mayeləşdirilmiş təbii qaz (LNG) daçıyıcıları vasitəsilə nəql edilib.

Belə ki, yanvarda Türkiyə Rusiyadan 1 mlrd. 837 mln. kub metr, İrandan isə 824 mln. kub metr təbii qaz idxal edilib. Təbii qazın qalan idxal hissəsi isə Əlcəzair, Nigeriya, ABŞ, Qətər, Misir, Ekvotorial Qvineyadan həyata keçirilib.