TANAP layihəsi üzrə işlər artıq son mərhələyə qədəm qoyub

TANAP layihəsinin iki fazası üzrə işlərin ümumilikdə 93 faizdən çoxu icra edilib. Bu il iyulun əvvəlindən etibarən TANAP-la Türkiyəyə kommersiya məqsədilə ilk qaz veriləcək.

Enerjinin ipək yolu kimi xarakterizə edilen boru kəməri Türkiyəyə 30 iyunda qaz ötürməyə hazırdır.

TANAP-ın baş direktoru Saltuk Düzyol deyib ki, uzunluğuna və diametrinə görə Cənub Qaz Dəhlizinin ən böyük hissəsi olan TANAP layihəsi üzrə işlər artıq son mərhələyə qədəm qoyub. TANAP-ın 56 düymlük 1350 kilometr uzunluğundakı hissəsinin inşası tamamlanıb, boru kəmərinə sınaq məqsədilə qaz vurularaq Əskişəhərə çatdırılıb. Bu hissədə boru kəməri marşrutu boyunca fiber-optik kabel də artıq çəkilib.

Layihə üzrə Faza-0, yəni cari ilin ortalarında ölkəmizin “Botaş” şirkətinin sisteminə ilk qazın qəbul edilməsi üçün işlərin 99 faizi tamamlanıb. Faza-1, yəni 2019-cu ilin sonunda Türkiyədən keçməklə Avropaya təbii qazın verilməsi üçün nəzərdə tutulan işlər üzrə isə 80 faizdən çox irəliləyişə nail olunub. İlkin mərhələdə TANAP-la Türkiyəyə ildə 2 milyard kubmetr qaz veriləcək. Daha sonrakı 3 il ərzində bu həcm 6 milyard kubmetrə çatdırılacaq.

Qeyd edək ki, TANAP ilə Avropaya  təbii qaz axışı isə 2020-ci ildə olacaq.

Boru kəmərindən Avropa ölkələrinə ildə 10 milyard kubmetr qaz axışı olacağı bildirilir.