Braziliyada daşqın qurbanlarının sayı 100 nәfәri keçib
Braziliyanın Rio-de-Janeyro əyalətində leysan yağışların səbəb olduğu daşqınlar və torpaq sürüşməsi nәticәsindә həyatını itirənlərin sayı 104 nәfәrә çatıb.
Braziliyanın Rio-de-Janeyro əyalətində leysan yağışların səbəb olduğu daşqınlar və torpaq sürüşməsi nәticәsindә həyatını itirənlərin sayı 104 nәfәrә çatıb.
Rio-de-Janeyro mülki müdafiə dәstәlәri Petropolis şəhərində daşqın və torpaq sürüşmələri nəticəsində 104 nəfərin həyatını itirdiyini açıqlayıb.
Rio-de-Janeyro qubernatoru Klaudio Kastro mətbuata verdiyi açıqlamada bölgənin 1932-ci ildən bəri әn güclü yağışa məruz qaldığını bildirib.
Axtarış-xilasetmə әmәliyyatlarını hәyata keçirәn yanğınsöndürənlərin 21 nəfəri xilas etdiyi, indiyədək 35 nəfərin itkin düşdüyü bildirilsə də, itkin düşәnlәrin dəqiq sayının hələ dә müəyyən edilmәdiyi bildirilib.
Daşqınlar vә torpaq sürüşmәsi nəticəsində azı 54 evin dağıldığı, 370-dən çox insanın başqa yerlәrә sığındığı açıqlanıb.
Səlahiyyətlilər 400-dən çox yanğınsöndürənin çalışdığı fəlakət səbəbindәn bölgədə fövqәladә vəziyyət elan edib və riskli ərazilərdə yaşayan insanları sığınacaq olaraq istifadə edilən bölgәlәrә getməyə çağırıb.
Fəlakət səbəbindən çox sayda məktəb və universitet binası evsizlərin sığındığı və ehtiyacı olanlara yardım edildiyi dəstək məntəqələrinə çevrilib.
Qeyd edәk ki, Petropolis şәhәrindә 2011-ci ildә yağan leysan yağışların sәbәb olduğu daşqınlar nәticәsindә 900-dәn çox adam hәyatını itirmişdi, 100-dәn çox adam da itkin düşmüşdü.