İraqda DEAŞ-a qarşı əməliyyat həyata keçirilib

İraqa məxsus döyüş təyyarələrinin ölkənin şərqindəki Diyala şəhərinə endirdiyi hava zərbələri nəticəsində terror təşkilatı DEAŞ üzvü 15 terrorçu öldürülüb.

Diyala polis qüvvəsində vəzifəli zabit Habib əş-Şemmeri bir qrup terrorçunun bölgədə hücum edəcəyinə dair əldə edilən kəşfiyyat çərçivəsində hava hücumu təşkil edildiyini, hava zərbələri nəticəsində 15 terrorçunun məhv edildiyini  bildirib.

Şemmeri hava hücumunda ayrıca terrorçulara aid 3 maşının da məhv edildiyini dilə gətirib.

Qeyd edək ki, İraqın baş naziri Heydər əl-İbadi 2017-ci ilin dekabrında DEAŞ terror təşkilatının 3 il davam edən hərbi mövcudluğunun sona çatdığını elan etmişdi. Ancaq təşkilatın tərkibindəki bir sıra qruplar İraqda bəzi bölgələrdə zaman-zaman terror aktları törətməkdə davam edirlər.