Ukraina tomonidan raketa bilan urilgan “Moskva” kreyseri cho‘kib ketdi

Rossiya Qora dengiz flotiga tegishli “Moskva” kreyseri cho‘kib ketganini ma’lum qildi.

Rossiya Mudofaa vazirligi Ukraina tomonidan Neptun raketasi bilan urilganini e'lon qilgan Rossiya Qora dengiz flotiga tegishli "Moskva" kreyserining so'nggi holati haqida bayonot berdi.

“Moskva” kreyserini belgilangan portga tortib borish paytida kemada yong‘in yuz berdi va korpusga yetgan zarar tufayli o‘z barqarorligini yo‘qotdi. Bo‘ronli dengiz sharoitida kema cho‘kib ketdi”, deyiladi bayonotda.

Bayonotda, kreyser ekipajining mintaqadagi Qora dengiz floti kemalariga evakuatsiya qilingani eslatildi.

Mudofaa vazirligi kemadagi yong‘in oqibatida o‘q-dorilar portlagani, bir muncha vaqt o‘tgach, yong‘in nazoratga olinib, o‘q-dorilar portlashlari to‘xtatilgani haqida xabar berdi.

Kemaning suzuvchi holatda ekanligi bildirilgan bayonotda, yong'in sababining o'rganilganligi va kemani portga tortish ishlari boshlanganligi bildirildi.

Ukraina rasmiylari 13 aprel kuni Qora dengizda Rossiyaning “Moskva” kreyseri Neptun raketasi bilan urilgani va kemada yong‘in chiqqani haqida ma’lum qildi. Qayd etilishicha, kreyser ekipajida taxminan 510 kishi bo‘lgan.

Ukraina matbuoti 24-fevralda boshlangan Rossiya-Ukraina urushining birinchi kunlarida Ilon orolida ukrainalik askarlarga hujum qilgan "Moskva" kreyseri 2014-yilda Qrimning noqonuniy anneksiya qilinishi paytida Ukraina kemalarining qirg‘oqdan chiqib ketishiga to‘sqinlik qilganini xabar qildi. 

"Moskva" kreyseri 700 kilometr masofaga uchadigan 16 ta kemaga qarshi raketalar, shuningdek, S-300 havo hujumidan mudofaa raketa tizimi bilan jihozlangan kema sifatida tanilgan.

2015-yilda kema Rossiya harbiy-dengiz kuchlarining O‘rta yer dengizidagi doimiy ishchi guruhiga rahbarlik qilgan va Suriyadagi Rossiyaning Xmeymim harbiy havo bazasini himoya qilish uchun xizmat qilgan.