lawrow: idlib mesiliside türkiye bilen birlikte heriket qiliwatimiz
rusiye tashqi ishlar ministiri sérgéy lawrow süriyening idlib shehiri kirizisini bu heqte hasil qilinghan kélishimlerge uyghun halda hel qilish üchün türkiye bilen birlikte heriket qiliwatqanliqlirini éytti.
türkiye awazi radiyosi xewiri: lawrow gérmaniyening paytexti bérlinde gérmaniye tashqi ishlar ministiri héyko maas bilen élip barghan uchrishishidin kéyin ötküzülgen qoshma axbarat élan qilish yighinigha ishtirak qildi.
idlibtiki özgirishler dairiside «toqunushmasliq rayonliri» berpa qilish kélishimige riaye qilishning zörürlükini tekitligen lawrow, bu dairide türkiye bilen birlikte heriket qiliwatqanliqlirini hemde nahayiti zor tirishchanliqlarni körsitiwatqanliqlirini qeyt qildi.
idlibtiki puqralargha qarita «insanperwerlik yardem karidorliri» ni shekillendürüsh üchün hesse qoshuwatqanliqlirini éytqan lawrow, amérika qoshma ishtatliri bashchiliqidiki ittipaqdash küchlirining ilgiri musul we reqqede élip barghan herbiy heriketliri toghruluq ortaq söhbet ötküzülmigenlikini hemde «insanperwerlik yardem karidorliri» shekillendürüsh toghruluq tirishchanliq körsitilmigenlikini eskertish bilen bir waqitta, reqqede otturigha chiqqan özgirishlerning «insaniy palaket» ikenlikini, biraq herqandaq bir seweb tüpeyli bu heqte héchkimning bayanat élan qilmighanliqini tekitlidi.
idlib kirizisi dairiside bu tedbirlerning élinghanliqini éytqan lawrow, rusiye pirézidénti wiladimir putin bilen türkiye jumhuriyiti jumhur reisi rejep tayyip erdoghanning bu heqte kéler heptining bashlirida muzakire élip baridighanliqini qeyt qildi.
térrorizmgha qarshi küreshning qilche boshashmastin izchil dawamlashturulidighanliqini eskertken lawrow, gérmaniye tashqi ishlar ministiri maas bilen élip barghan uchrishishida, süriyening ijtimaiy we ul eslihe qurulushliri sahelirining qayta berpa qilinish mesilisi toghruluq söhbet ötküzülgenlikini, bu heqte zémin hazirlinishining shert ikenlikini, chünki buning siyasiy basquchqa hesse qoshidighanliqini tekitlidi.
gérmaniye tashqi ishlar ministiri maasmu rusiyeni idlibke qilinghusi hujumgha taqabil turushqa chaqirip mundaq dédi: «süriye hökümiti teripidin idlibke qilinghusi keng kölemlik bir hujumning milyonlarche insangha nisbeten palaketlik aqiwetlerni keltürüp chiqirish xewpi bardur.»
birleshken döletler teshkilati tizimlikige kirgüzülgen térrorluq teshkilatlirigha qarshi küresh qilish imkaniyitining barliqini éytqan maas, puqralarning bixeterlikini qoghdashning zörürlükini qeyt qildi.
uchrishishta, ximiyelik qorallarning ishlitilishige taqabil turush mesilisi toghriliqmu muzakire élip bérilghanliqini eskertken maas, süriye hökümitining ximiyelik qorallarni ishlitishining aldini élish üchün rusiyening beshshar esed hakimiyiti üstidiki nopuzini ishqa sélishini telep qildi.
u yene, süriyeni qayta qurup chiqish mesiliside ishenchilik bir siyasiy basquchning bashlinishi we pütkül süriye xelqi teripidin qobul qilinidighan bir hel qilishi charisi tépilishning zörürlükinimu sözlirige ilawe qildi.
