әрдоған: исираилийә даирилириниң сораққа тартилиши үчүн барлиқ механизмлардин пайдилинимиз
җумһур рәис рәҗәп таййип әрдоған түркийә болуш сүпитимиз билән исираилийә даирилириниң қанун вә тарих алдида сораққа тартилиши үчүн бар болған барлиқ механизмлардин пайдилиништин чекинмәйдиғанлиқлирини билдүрди.
түркийә авази радийоси хәвири: рәҗәп таййип әрдоған конйа мәвлана мәдәнийәт мәркизидә өткүзүлгән мәвланә җалалидин руми вапатиниң 750-йиллиқини хатириләш мурасимиға телеграмма әвәтти.
у телеграммисида, мутәпәккур, мутәсәввуф вә көңүл султани мәвланә җалалидин румини миннәт билән йад әткән һалда: «мәвлана җалалидин руминиң һикмәт булиқидин сүзүлгән тәвсийәлиригә һәр даимкидин техиму еһтийаҗлиқ болған күнләрни баштин кәчүрмәктимиз» деди.
у 7-өктәбир (2023) дин буйан ғәззәдә вә ишғал астидики пәләстин земинлирида йүз бәргән исираилийә һуҗумлири үстидә тохтилип: «өзлирини кишилик һоқуқ вә әркинликниң қоғдиғучиси сүпитидә көрсәткән мәлум дөләтләрниң шәртсиз қоллишиға еришкән исираилийә һөкүмити зулумниң дәриҗисини техиму йуқири көтүрүп қан төкүшни, җанға замин болушни, кичик балиларни өлтүрүшни давамлаштурмақта» деди.
у исираилийә даирилириниң қанун вә тарих алдида сораққа тартилиши үчүн бар болған барлиқ механизмлардин пайдилиништин чекинмәйдиғанлиқлирини тәкитләп: «мәвланә җалалидин руминиң йолидин меңип, кишиниң диний етиқадиға, миллитигә, тән рәңгигә, кимликигә қаримастин аҗиз вә бигунаһ кишини қоллашни давамлаштуримиз» деди.
