ياۋروپا ئىتتىپاقى ئەمەلدارلىرى تۈركىيەدە زىيارەتتە بولىدۇ

تۈركىيە ئاۋازى رادىيوسى خەۋىرى: تۈركىيە جۇمھۇرىيىتى تاشقى ئىشلار مىنىستىرلىقى بۇ ھەقتە بايانات ئېلان قىلىپ: «ياۋروپا ئىتتىپاقىنىڭ قوشنىدارچىلىق ۋە كېڭىيىش ئىشلىرىغا مەسئۇل كومىسسارى ئولىۋېر ۋارخېلى بىلەن ياۋروپا ئىتتىپاقى كېڭىشىنىڭ نۆۋەتچى رەئىسى شىۋېتسىيەگە ۋاكالىتەن، خەلقئارا تەرەققىيات، ھەمكارلىق ۋە تاشقى سودا مىنىستىرى يوھان فورسسېل دۆلىتىمىزدە يۈز بەرگەن يەر تەۋرەشلەردىن كېيىن، ياۋروپا ئىتتىپاقى كاندىداتى تۈركىيە بىلەن بولغان ئىتتىپاقلىقىنى نامايان قىلىش، قوللايدىغانلىقىنى بىلدۈرۈش ۋە تۈركىيەدىن ھال سوراش ئۈچۈن،  2023 - يىلى 2 -ئاينىڭ 21 - كۈنىدىن 22 - كۈنىگىچە دۆلىتىمىزدە زىيارەتتە بولىدۇ.

كومىسسار ۋارخېلى بىلەن مىنىستىر فورسسېل ھۆرمەتلىك مىنىستىرىمىز (مەۋلۈت چاۋۇشئوغلۇ) بىلەن ئەنقەرەدە كۆرۈشۈپ، ياۋروپا ئىتتىپاقىنىڭ يەر تەۋرەش رايونىغا قوشۇمچە ياردەم بېرىشى ۋە مارتتا ئۆتكۈزۈلۈشى پىلانلىنىۋاتقان خەلقئارالىق يىغىننىڭ ئورۇنلاشتۇرۇشى قاتارلىق مەسىلىلەرنى مۇزاكىرە قىلىدۇ» دېگەنلەرنى قەيت قىلدى.