erdoghan bilen néxammér téléfonlashti

türkiye awazi radiyosi xewiri: türkiye jumhuriyiti jumhur reislik mehkimisi uchur – alaqe ishliri idarisi, jumhur reis erdoghan bilen bash ministir karl néxammérning téléfon söhbiti ötküzüp, türkiye-awstriye munasiwetlirini ilgiri sürüshning qedem basquchliri we rusiye - ukraina urushini öz ichige alghan rayonluq mesililer toghrisida sözleshkenlikini uqturdi.

jumhur reis erdoghan söhbet jeryanida, türkiye bilen awstriye otturisidiki yéqindin buyan qoyuqlishishqa bashlighan yuqiri derijilik alaqilerdin xushal ikenlikini, ikki dölet otturisidiki eng küchlük insaniy rishtini teshkil qilghan awstiriyediki türkiye jamaitining parawanliqi we tinchliqi üchün körsitilidighan sezgürlükning, nöwettiki ijabiy keypiyatni téximu mustehkemleydighanliqini tilgha élip ötti.

erdoghan 24- féwraldin bashlap urush halitini bashtin kechürüwatqan rusiye bilen ukraina otturisida tinchliq berpa qilish üchün qolidin kélishiche tirishchanliq körsitishni dawamlashturidighanliqini eskertti.

türkiye- yawropa munasiwitining turaqlashqan méxanizmlirining qaytidin ishqa kirishtürülushi, (türkiye puqraliri üchün) wizini erkin qoyuwétish musapiside konkrét ilgirileshlerning qolgha keltürülüshi, (ezaliq muzakiriliride) yéngi söhbet sahelirining échilishi we tamozhna birlikige özgertish kirgüzüsh xizmetlirining kéchiktürülmestin bashlinishi kérekliki toghrisidiki ümidlirini otturigha qoyghan jumhur reis erdoghan, kaspiy oymanliqi we sherqiy aqdéngizdiki énérgiye bayliqining türkiye arqiliq yawropagha toshulushining istratégiyelik ehmiyitini tilgha élip ötti.

u, türkiyening, yawropaning tebiiy gaz sahesidiki muhim tarqitish merkizi bolghan awstriye bilen bolghan bu nuqtidiki hemkarliqini kücheytishining mumkinlikini sözlirige ilawe qildi.