04.04.2018

türkiye awazi radiyosi: «weten géziti», türkiyening tunji yadro éléktir istansisi bolup qalidighan mersin akkuyu yadro éléktir istansisining ulini, jumhur reis rejep tayyip erdoghan bilen rusiye pirézidénti wladimir putinning birlikte qoyghanliqini xewer qildi.

gézitning xewiride, jumhur reis rejep tayyip erdoghanning murasimda söz qilip: «bügün dölitimizning tereqqiyati we rusiye bilen bolghan énérgiye hemkarliqimizdiki tarixiy bir minutqa guwahliq qiliwatimiz» dégenliki qeyt qilindi.

xewerde, rusiye pirézidénti putinning akkuyu yadro éléktir istansisining bixeter we muhitning dosti bolidighanliqini éytqanliqi eskertildi.

«sabah géziti», türkiye jumhur reisi rejep tayyip erdoghan bilen rusiye pirézidénti wladimir putinning akkuyu yadro éléktir istansisining ulini qoyush murasimida söz qilghanliqini xewer qildi.

xewerde qeyt qilinishiche, murasimdin kéyin jumhur reis rejep tayyip erdoghan twittérda türkche we rusche twit hembehirligen. rejep tayyip erdoghan: «dölitimizning 30 yilliq arzusi bolghan akkuyu yadro éléktir istansisi, türkiyening tereqqiyati we rusiye bilen bolghan énérgiye hemkarliqimiz üchün tarixiy sélinma hésablinidu. bu sélinmining emelge éshishigha hesse qoshqanlargha teshekkür éytimen we barliq mesullirimizni tebrikleymen. akkuyu yadro éléktir istansisini 2023-yilidin bashlap xizmetke kirishtürüsh nishanimizgha yétish üchün birlikte tirishimiz. rusiye bilen rayonluq mesililerdiki hemkarliqimiznimu künséri kücheytken halda dawamlashturushta qetiy iradige igimiz» dégen.

«yéngi shepeq géziti», jumhur reis rejep tayyip erdoghan bilen rusiye pirézidénti wladimir putinning birlikte axbarat élan qilish yighini ötküzgenlikini xewer qildi.

ikki rehberning «S-400» hawa qalqan sistémiliri toghrisida toxtalghanda, rejep tayyip erdoghanning: «S-400 heqqide kélishim tüzduq, biz bu depterni yaptuq, ish tügidi, emdi u ishni pütküzüsh jeryani dawam qiliwatidu» dégen. rusiye pirézidénti wladimir putin bolsa: «yolyoruq waqtini qisqartish qarari alduq» dégen.

«star géziti», jumhur reis rejep tayyip erdoghan bilen rusiye pirézidénti wladimir putinning jumhur reislik sariyida bir yérim saet söhbet ötküzgenlikini xewer qildi.

xewerde, körüshüshtin kéyin, putin bayanat élan qilip: «türkiyege S-400 sétip bérilishi, moskwa bilen enqere otturisidiki herbiy hemkarliqta aldin ehmiyet bérilidighan ishtur» dégenliki bildürüldi.

«xeber türk géziti», bilim, sanaet we pen-téxnika ministiri faruq özlüning istanbulda ötküzülgen «yuqiri örligen shirketler» namliq doklatni tonushturush yighinida söz qilip: «aldinqi sanaet inqilablirini arqida turup körduq, kéyinki barliq waqitlarda boshluqimizni toldurushqa tirishtuq. emdi tereqqiyatlarni közitish munarida turup közitidighan, ishning waqti ötüp ketkendin kéyin, uninggha maslishishiqa tirishidighan dölet emes, belki tereqqiyatning muhim aktiyorliridin biri bolimiz. türkiye dunyadiki kütüwélish zalidin chiqti, 2023-yilliq nishanimizmu, 2053-yilliq nishanimizmu bu yönülüshte kétiwatidu. nishanlirimizdiki mewjud bolghan meqsetlirimizni emelge ashurush üchün kütüp turalmaymiz, waqitni bikar ötküzelmeymiz» dégenlikini xewer qildi.