21.02.2018
bügünki türkiye gézitliride asasiy salmaqni igiligen xewerlirimizning asasiy mezmunliri töwendikiche:
türkiye awazi radiyosi: «sabah géziti», dölitimiz jumhur reisi rejep tayyip erdoghanning jumhur reislik sariyida makédoniye pirézidénti giyorgi iwanow bilen körüshüshini axirlashturghandin kéyin ötküzülgen ortaq axbarat élan qilish yighinida, afringha kirmekchi bolghan beshshar esed hakimiyiti terepdari térrorist guruppilar toghrisida toxtalghanliqini xewer qildi.
xewerde, jumhur reis rejep tayyip erdoghanning, «putin we ruhani bilen ötküzgen söhbetlirimizde, bu mesile toghrisida hasil qilghan pikir birlikimiz bar, bilgininglardek, nahayiti epsuski bu xil térrorluq teshkilatliri bezide öz aldigha heriket qilidu, bulargha hergiz purset bermeymiz, ular nahayiti éghir bedel töleydu» dégenliki qeyt qilindi.
«xeber türk géziti», jumhur reislik sariyi bayanatchisi ibrahim kalinning süriyede beshshar esed hakimiyiti bilen térrorluq teshkilati p k k ning gumashtisi y p g/ p y d ning afrin kélishimi tüzülgenliki toghrisida tarqalghan xewerler heqqide bayanat élan qilghanliqini xewer qildi.
xewerde, ibrahim kalinning, «bu xewerlerning teshwiqat meqsitige ige ikenliki nahayiti éniq. bir qatar mexpiy we meynet sodilar bar, kimning néme qilishidin qetiynezer herbiy heriket nishanigha yétidu» dégenliki bildürüldi.
«weten géziti», kolumbiye pirézidénti santosning wénézuéladin kéliwatqan musapirlar dolquni mesilisini hel qilish üchün türkiyege bir heyet ewetkenlikini xewer qildi.
gézitning xewiride bildürülishiche, pirézidént santos «blu radiyo» sining ziyaritini qobul qilghanda, xelqaraning yardimini qobul qilishqa teyyar ikenlikini eskertken. u musapirlar dolqunigha taqabil turush tejribilirining kemchil ikenlikini, bu sewebtin türkiyege oxshaydighan döletlerni ülge qilghanliqlirini éytqan.
«star géziti», aqdéngizdiki merwayit sheher hésablinidighan antalyaning bu yil (2018) 12 milyon sayatchini kütüwatqanliqini xewer qildi.
aqdéngiz sayahetchilik méhmansaraylar birleshmisi (AKTOB) ning bashliqi erkan yaghji dunya miqyasida sayahet qiliwatqan kishiler sanining 2016-yilgha sélishturghanda texminen %7 éship, 1 milyard 322 milyongha yetkenlikini bildürüp: «2018-yilda antalyada sayahetchiler köpiyidu, sayahetchiler sanining 12 milyongha yétishini texmin qilimiz» dégen.
«yéngi shepeq géziti», artwin wilayiti arhewi nahiyesige qarashliq kemerköprü yézisida yashaydighan osman kaba üch yil burun baliliqidiki xiyalini emelge ashurush üchün yasighan derex öyning diqqet tartip, sayahetchilerge échiwétilgenlikini xewer qildi.
xewerde, aylanmisi texminen 15 métir, égizliki 8 métir kélidighan, ichide hajetxana, muncha we issiq su bar bolghan yette adem qonalaydighan derex öyning, sekkiz bulungluq, ögzisining renglik we ajayip menzirelik ikenliki bildürüldi.
