10.08.2017

türkiye awazi radiyosi: «yéngi shepeq géziti», bilim, sanaet we téxnika ministiri faruq özlü biwaste sélinidighan mebleghlerning bixeter döletlerni telep qilidighanliqini eskertip, 2016-yilida türkiyege chet eldin 12.1 milyard dollar biwaste meblegh kirgenlikini éytqanliqini xewer qildi.

xewerde, türklerning tarixta héchqachan békinmichilik qilmighanliqini, tarixta qurghan döletliriningmu békinme dölet emeslikini bildürüp: «türkiye barliq tetür teshwiqatlargha qarimay, chet el mebleghlirini özige jelp qiliwatidu» dep éytqanliqi qeyt qilindi.

«hörriyet géziti», sehiyege meblegh salghuchilar jemiyitining bashliqi doktor ihsan shahinning, türkiyening sehiye sayahetchiliki saheside dunyadiki aldinqi qatarda turidighan besh döletning arisigha kirgenlikini éytqanliqini xewer qildi.

u mundaq dégen:

«xelqarada riqabetchilirimiz köp bolsimu, türkiye bu sahediki her qandaq qiyinchiliqni yéngip kételeydu. türkiyening dunya miqyasida sehiye sayahetchilikige salghan mebleghliri yaxshi méwe bérishke bashlidi, türkiyege dawalinish üchün kelgen sayahetchilerning sani yilséri ashmaqta.»

«sabah géziti», 2016-yili dölet organlirining hazirghiche körülüp baqmighan nisbette kirim qilghanliqini xewer qildi.

xewerde, 2016-yili dölet organliri kirimining 2.7 milyard liradin 17.4 milyard liragha chiqqanliqini, 25 dölet orginining bu kirimidin sirt, dölet merkiziy bankisi we bashqa dölet bankiliri bilen mezkur organlar hemde ishtirakchilardin jemiy 15.9 milyard lira payda élinghanliqi bildürüldi.

«weten géziti», türkiye armiyesi üchün alte ayropilan sétiwélinidighanliqini xewer qildi.

xewerde qeyt qilinishiche, quruqluq armiyesige «CASA CN-235 » tiransiport ayropilani bilen oxshash süpetke ige alte ayropilan sétiwélinidighan bolup, ayropilanlarning herbiy xadim we eshya toshush artuqchiliqidin bashqa, hawadin yerge bashqurulidighan bomba qoyup bérish iqtidari bar iken.