08.08.2017
bügünki türkiye metbuatliridin tallap teyyarlighan xewerlirimizning qisqiche mezmunliri töwendikiche:
türkiye awazi radiyosi xewiri: «‹star› géziti», «türkiyege sélinghan mebleghlerning % 70 ti yawropadin» serlewhilik xewiride, töwendiki melumatlargha orun ajratti:
dunyadiki géopolitikiliq xirislar we muqimsizliqlarning tesiride xelqaraliq biwasite sélinmilar dawalghushluq dewrni bashtin kechürüwatqan bir peytte, türkiyege bu yilning deslepki 5 éyi ichide 5 qitedin meblegh sélindi.
5 qitedin sélinghan mebleghler bilen bu yilning deslepki 5 éyida xelqaraliq biwasite sélinmilarning miqdari % 11 lik éshish bilen 4.7 milyard dollargha yetti. türkiyening eneniwi xelqaraliq sélinma menbeliri bolghan amérika we yawropadin sélinghan mebleghlerning miqdarida héchqandaq aziyish körülmeslik bilen bir waqitta, paris qoltuqi elliri we yiraq sherqiy asiyadin sélinghan mebleghlerde éshish körüldi.
«‹sabah› géziti», «türkiye shamal énérgiyeside yawropa boyiche 4 – orunda turidu» serlewhilik xewiride, töwendiki uchurlarni oqurmenliri bilen ortaqlashti:
türkiye shamal énérgiyeside yanwardin tartip iyulghiche bolghan 377 mégawatliq iqtidari bilen yawropa boyiche 4 – retke tizildi.
yawropa shamal énérgiyesi birliki (WindEurope) ning bildürüshiche, yawropada bu yilning deslepki 6 éy ichide jemiy 6 ming 100 mégawatliq shamal iqtidari sistémigha daxil qilinghan.
bu mezgilde gérmaniye yawropada 2 ming 200 mégawatliq shamal énérgiyesini sistémigha daxil qilip, birinchi retke tizilghan, 1200 mégawat bilen engliye ikkinchi retke, 492 mégawat bilen firansiye üchinchi retke, türkiye bu yilning deslepki yérimida 377 mégawatliq shamal énérgiyesini sistémigha daxil qilish bilen tötinchi retke tizilghan.
«‹xewer türk› géziti», «xitay 2018 – yilini türkiye sayahet yili qilip békitti» serlewhilik xewiride, töwendiki melumatlargha orun ajratti:
türkiye sayahetchiler agéntliqliri birlikining ezasi bolghan we xitay bilen hemkarliq ornitiwatqan sayahet organliri 2018 – yili xitayda «türkiye sayahet yili» élan qilinishi dairiside ötküzülgen yighinda bir yerge jem boldi.
türkiye sayahetchiler agéntliqliri birlikining bildürüshiche, 2018 – yili xitayda «türkiye sayahet yili» élan qilinghan.
«‹star› géziti», «aywaliqning zeytuni xongkonggha yürüsh qildi» serlewhilik xewiride, töwendiki mezmunlargha orun ajratti:
balikesirning aywaliq nahiyeside paaliyet élip bériwatqan bir shirket bu yilning aldinqi 6 éyi ichide xongkonggha 150 ming dollarliq zeytun, zeytun yéghi, zeytun sopuni, zeytun murabbasi, zeytun süti, zeytun loqumi, zeytundin yasalghan etir éksport qildi.
türkiye we chet ellerde qatnashqan musabiqilerde özi ishlepchiqarghan zeytun yéghi munasiwiti bilen türlük mukapatlargha érishken shirketning 4 – ewlad wekili mustafa kürlek, ata – bowiliridin qalghan bu mirasning dairisini téximu kéngeytishni nishan qiliwatqanliqlirini éytti.
«‹höriyet› géziti», «ramilgha muweppeqiyet tileymiz» serlewhilik xewiride, töwendiki melumatlarni oqurmenliri bilen ortaqlashti:
londonda ötküzülgen 16 – nöwetlik dunya yénik atlétika lewhe talishish musabiqiside türkiyege wekillik qiliwatqan milliy mahirlardin ramil guliyéw erler 200 métirgha yügürüsh türide yérim hel qilghuch musabiqige qatnshish salahiyitige érishti. guliyw ete yérim hel qilghuch musabiqige qatnishidu.
