28.08.2014

türkiye awazi radiyosi xewiri: «‹ hürriyet› géziti», «dawutoghlu bashliqliqqa saylandi» serlewhilik xewiride, adalet we tereqqiyat partiyesining, enqere aréna tenterbiye zalida ishqa ashurulghan 1 - nöwetlik qurultiyida rehberlik saylimi ötküzülgenlikini yazdi. gézit, qurultay kéngishining bashliqi xaluq ipekning, saylamda 1388 bélet tashlanghanliqini, buningdin 1382 béletning küchke ige, 6 sining küchke ige emeslikini eskertip, «bu netijilerge köre, diplomatiye ministiri ehmet dawutoghlu we konya parlamént ezasi ehmet dawutoghlu 1382 awaz bilen adalet we tereqqiyat partiyesi bashliqliqigha saylandi» dégen sözlirini neqil keltürdi.
«‹yéngi shepeq› géziti», «méyiplargha 36 ming lira yardem bérilidu» serlewhilik xewiride, türkiye soda kéngishi teripidin ishqa kirishtürülgen we ikkinchi mewsum üchün iltimas sunush dawamlishiwatqan layihe dairiside karxana quridighan méyiplargha 36 ming liraghiche yardem puli bérilidighanliqini oqurmenliri bilen ortaqlashti. gézit, iltimas sunushning 12 - séntebirgiche dawamlishidighanliqini yazdi. gézitning xewirige köre, jismaniy, zéhniy, rohiy, hés - tuyghu we ijtimaiy iqtidaridin türlük sewiyelerde ayrilip qélishi tüpeyli emgek küchining kem dégende % 40 ti kemchil ikenliki sehiye organlirining doklatliri arqiliq ispatlanghan we emgek iqtidarini pütüley yoqatmighan méyiplar özliri turushluq wilayetlerde ishqa ashuridighan layiheliride yardem puligha érisheleydiken.
«‹sabah› géziti», «ghezzediki doxturxanilargha xelqaraliq doxturlardin yardem» serlewhilik xewiride, xelqaraliq doxturlarning, pelestin sehiye ministirliki we ghezze islam uniwérsitéti méditsina fakultéti bilen hemkarliq ornatqanliqini yazdi. gézitning xewirige qarighanda, xelqaraliq doxturlar ijraiye heyiti ezasi we istanbul medeniyet uniwérsitéti méditsina fakultéti tashqi késellikler bölümi bashliqi piroféssor doktor orhan alimoghlu, israiliyening ghezzege qaratqan hujumliridin kéyin, 10 - 17 - awghust künliri rayonda ziyarette bolghanliqlirini eskertken hemde imzalanghan kélishimler toghruluq toxtilip mundaq dégen: «bu dairide, ghezzening urush jeryanida weyran bolghan doxturxanilirining ul eslihe qurulushliri, doxturxanilarda ishlitidighan tibbiy üsküniler we mutexessis doxturlarning oqush püttürgendin kéyin bilim ashurushigha yardem bérish, kelgüside bu shekilde yarilanghanlarni ünümlük dawalashni qolgha keltürüsh üchün kespiy xadimlarni yétishtürüsh pirogrammilirini ishqa kirishtürüsh, uniwérsitétlar ara oqutquchi - oqughuchi almashturush mesiliside birdeklik hasil qilduq.»
«‹ radikal› géziti», « ICQ türk tilida qaytish aldida turmaqta» serlewhilik xewiride, téz süretlik uchurlishish pirogrammilirining bayraqdari bolghan ICQ ning qaytidighanliqini yazdi. gézit, türk tilida qaytidighan pirogrammining, heqsiz SMS (uchurlishish), awazliq we körünüshlük uchurlishishtin sirt yene, guruppa söhbetlirige oxshighan qoshumche alahidiliklergimu ige ikenlikini, bizge tonushluq bolghan uchur awazining qaytidin hemme yerde anglinishqa bashlaydighanliqini oqurmenliri bilen ortaqlashti.