20.08.2014

yéngi shepeq géziti, türkiyening ghezzege yardem qilghanliqi heqqide xewer élan qildi. gézit énérgiye we tebiiy bayliqlar ministiri taner yildizning pelestin énérgiye ministiri omer qitanah bilen körüshkenlikini yazdi. xewerde, pelestinde qisqa, ottura we uzun mezgilde énérgiye saheside némilerni qilish kérekliki heqqide muzakire ötküzgenlikini qeyt qilghan taner yildizning, «100 mégawatliq éléktir istansisini ghezzediki bir port etrapigha orunlashturup énérgiye ishlepchiqirishni oylishiwatimiz. israiliyedin kélidighan 10 liniye bombardiman qilindi we ghezze 120 mégawatliq énérgiyedin mehrum boldi. türkiye énérgiye siyasetlirini tinchliqqa mas halda yolgha qoyidu» dégenliki qeyt qilindi.
sitar géziti «türkiye namratliqqa qarshi küreshte ülgilik dölet» serlewhilik xewiride, xususiy karxanilarning namratliqqa qarshi kürishidiki rolining türkiyening soda-sanaetchiler we paychikler uyushmisi bilen birleshken döletler teshkilati tereqqiyat pirogrammisi istanbul xelqara xususiy sahe we tereqqiyat merkizi hemkarliqi astida ötküzülgen yighinda muzakirige qoyulghanliqini yazdi. gézit,yighinda söz qilghan türkiye soda-sanaetchiler we paychikler uyushmisi bashliqi rifat hisarjiklioghluning «türkiye namratliqqa qarshi küreshte nemune dölettur» dégenlikini oqurmenliri bilen ortaqlashti. xewerde dunyada iqtisadi küchlük döletler déyilgende türkiyeningmu ismi tilgha élinidighanliqini éytqan rifat hisarjiklioghluning, «türkiye sanaiti, yéza-igiliki we tebiiy bayliqliri we ixtisasliq insanliri bilen  20 dölet guruhining eng aktip ezaliridin biridur» dégenliki bildürüldi.
sabah géziti «monako tarkanning yoligha qarimaqta» serlewhilik xewiride, dunyagha meshhur cholpanlarni kütüp kéliwatqan karlo sammér féstiwalining yépilish murasimida tarkanning naxsha éytidighanliqini uqturdi. gézit, yawropa xan jemiti xan we xanishliridin sirt meshhur kishilermu köridighan konsért üchün teyyarliq xizmetlirining tamamlanghanliqini yazdi. xewerde, firansiye cholpini monakoning monté karlo shehride 40 yildin buyan ötküzüp kéliwatqan, dunyagha meshhur cholpanlar oyun qoyidighan «monté karlo sammér féstiwali»ning, bu yil tunji qétim bir türk cholpinini kütüwalidighanliqi, u türk cholpinining tarkan ikenliki, tarkanning 22-awghustta féstiwalning yépilishida naxsha éytidighanliqi uqturuldi.
hürriyet géziti, «yawropani keynide qaldurdi» serlewhilik xewiride, dunya altun kéngishining 2014-yili ikkinchi cherekide altun doklatining élan qilghanliqini oqurmenliri bilen ortaqlashti. gézit, doklatta eng köp altun zapisi bolghan 40 döletning tizimlikke kirgüzülgenlikini, türkiyening nurghun muhim organ we döletni arqida qaldurup tizimlikning 12-qataridin orun alghanliqini yazdi.
milliyet géziti, «wélispit yoli layihesi qollashqa érishti» serlewhilik xewiride, muhit we sheher-qurulush ishliri ministirliqining sheherlik hökümetler teyyarlap chiqqan wélspit yoli layihelirige 4 milyon 718 ming türk lirasi yardem qilghanliqini uqturdi. gézit, qatnash keltürüp chiqarghan hawa bulghinishni azaytish, shawqun-sürenni peseytish, yersharining issip kétishige tosalghu bolushta rol oynaydighan, insanlarning salametliki we muhitning qoghdilishi nuqtisidin muhim ehmiyetke ige bolghan, iqtisadqimu ijabiy tesir körsitidighan wélispt minishni omumlashturush üchün teyyarlghan layihening muhit we sheher-qurulush ministirliqining qollishigha érishkenlikini oqurmenliri bilen ortaqlashti.