16.08.2014

türkiye awazi radiyosi xewiri: «‹yéngi shepeq› géziti», «ghezzede aqiwet intayin qorqunchluq» serlewhilik xewiride, israiliye 2 minggha yéqin puqrani qetle qilghan ghezzede yarilanghan 10 ming pelestinlikning minggha yéqinining qalghan ömrini méyip halette ötküzüshke mejbur ikenlikini yazdi. gézit, xelqaraliq doxturlar teshkilatining bashliqi kérem qiniqning, «saghlamliq layihesini ishqa kirtshtürimiz, eng muhim wezipimiz jiddiy yaridarlarni türkiyege ewetish» dégen sözlirini neqil keltürdi.
«‹sitar› géziti», gérmaniyening paytexti bérlinde ming kishining, xelqara jamaetchilikning nezirini 11 - awghust küni mewlana jameside yüz bergen ot apitige aghdurush meqsitide jamening aldida yolda jüme namizi qilghanliqini yazdi. gézit, mewlana jamesi jamaitining sikalitzér yolida jüme namizi qilghandin kéyin bérlin islam fédératsiyesi bashliqi fazli altinning, jüme namizidin kéyin bergen bayanatida, «bu mesilining tekshürüp bir terep qilinishini ümid qilimiz, chünki aramxuda uxliyalmawatimiz, daim endishe ichide yashawatimiz, yehudiy düshmenlikige qarshi qandaq tedbir élinsa, islam düshmenlikige qarshimu shundaq tedbir élinishini kütüwatimiz, undaq bolmighanda musulmanlarning béshigha téximu éghir musibetler kélidu» dégen sözlirini oqurmenliri bilen ortaqlashti.
«‹xewer türk› géziti», «dunya sehiye teshkilati ébola wirusigha sel qaralghanliqini bildürdi» serlewhilik xewiride, dunya sehiye teshkilatining, gherbiy afriqigha tehdit séliwatqan we 1069 kishining ölümige seweb bolghan ébola wirusi toghruluq élan qilghan bayanati heqqide melumat berdi. gézit, bu heqte élan qilghan bayanatida, ébola wirusigha sel qaralghanliqini eskertkenlikini, jiddiy tedbir élinishining zörürlükini tekitligenlikini eskertti.
«‹sitar› géziti», «milyonérlirimizning sani 70 ming 714 ke yetti» serlewhilik xewiride, bankichiliqni nazaret qilip bashqurush orginining melumatlirigha qarighanda, iyun éyi étibari bilen herqaysi bankilarda 1 milyon liradin artuq puli bar abontlar sanining 70 ming 714 ke yetkenlikini yazdi. gézit, bu yilning aldinqi yérimida milyonérlar kulubigha 3 ming 868 milyunérning qoshulghanliqini, shuning bilen milyonérlar omumiy pulining 455.7 milyard liragha yetkenlikini oqurmenliri bilen ortaqlashti.
«‹milliyet› géziti», «biryussél meydani nahayiti katta türk gilimige aylandi» serlewhilik xewiride, bélgiyening paytexti biryussélda sheherning eng meshhur Grand Place meydanining, 600 ming béguniye gülliri bilen bézilip, nahayiti katta türk gilimige aylandurulghanliqini yazdi. gézit, meydanning otturisigha orunlashturulghan qizil, sériq, qizghuch sériq we hal renglik béguniye gülliri we chimlar arqiliq nahayiti katta türk gilimi yaritilghanliqini eskertti. gézitning xewiride, bélgiyege türk emgek küchi köchmenlikining 50 - yilliqini xatirilesh paaliyetliri dairiside ishqa ashurulghan türk gilimining boyi 75 métir, éni 25 métir kélidighan 875 kuwadrat métirliq bir sahege yéyilghanliqi eskertildi.
«‹weten› géziti», «tenterbiye xewerliri» sehipisidiki, «elwida tengdashsiz rehber» serlewhilik xewiride, beshiktash komandisi we türk putbol sahesining simwoli sulayman sebaning, istanbulda axiretke uzitip qoyulghanliqini yazdi. gézit, sebaning jinaza murasimigha her reng we her sahedin minglarche kishining ishtirak qilghanliqini oqurmenliri bilen ortaqlashti.